Pavlodar oblysy, Maı aýdanynyń ákimi Ardaq Qańtarbaev bastaǵan jumys toby ońtústik óńirde bolyp, aýdandardy aralady. Ordabasy aýdanyna barǵan top músheleri Badam, Shubarsý, Temirlan eldi mekenderindegi turǵyndarmen kezdesti, dep habarlaıdy QazAqparat.
Kezdesý barysynda shalǵaıdan kelgen basshylar azamattardy soltústik óńirlerine qonystandyrý jobasynyń maqsatymen tanystyryp ótti. Úkimetpen ońtústik óńirlerden soltústik oblystarǵa kóshýge nıetti adamdardy yntalandyrýdyń jańa baǵyttary engizilgenin aıtyp ótti. Sonymen qatar, qonys aýdarǵandardyń shyǵyny 35 AEK kóleminde óteletini, ıaǵnı otbasynyń árbir múshesine 79 myń teńge somasynda beriletini sóz bolyp, bir jyl boıy kóship barǵan otbasynyń baspanany jaldaýǵa jumsaıtyn shyǵyndary sýbsıdııalanatyny jetkizildi.
Maı aýdanynyń basshysy Elbasynyń kóregendik saıasatyn naqty júzege asyrý turǵysynda túrli salalarda, atap aıtqanda, aýyl sharýashylyǵy, jáne óndiris salasynda áleýeti zor, degenmen jumys kúshi tapshy teriskeıde múmkindikterdiń mol ekenin áńgimeledi. Aýdan ákimi soltústik ólkeni áleýmettik-ekonomıkalyq turǵydan damytý úshin ońtústik, sonyń ishinde Ordabasy aýdany jurtshylyǵynyń qol ushyn sozýynan úmittenip kelgenin jasyrmady.
Jıyn barysynda máseleniń mán-jaıyna baılanysty suraqtar qoıyp, kóp nársege qanyqqan birqatar turǵyndardyń qonys aýdarýǵa degen ynta-yqylastary ańǵaryldy.
Búginge deıin Ordabasy aýdanynan Soltústik Qazaqstan oblysyna 6 otbasy qonys aýdaryp, taǵy 6 otbasydan ótinish tústi. Endigi kezekte, Maı aýdanyna qonys aýdarýdyń tıimdiligi men artyqshylyqtary turǵyndar arasynda keńinen nasıhattalmaq.
Aıta ketý kerek, ońtústik halqyn soltústikke qonystandyrý baǵdarlamasy úshin bıyl 85 mlrd teńge bólingen.