Ońtústik Qazaqstan oblysynda bıyl 501 nysan nemese 1356,1 shaqyrym jol men kóshe, 3 jaıaý júrginshiler ótkeli jáne 12 kópirde jóndeý jumystaryn bastaý josparlanyp otyr, - dep habarlaıdy OQO ákiminiń baspasóz qyzmeti.
Baspasóz qyzmetindegilerdiń málimetinshe, jumystardy atqarýǵa bıýdjetten 26 mıllıard teńgeden asa qarjy bólingen. "2017 jyly 11 nysan, ıaǵnı 50,7 shaqyrym jol men 3 jaıaý júrginshiler ótkeli jańadan salynsa, 17 nysan - 59,9 shaqyrym jol qaıta jańarýdan ótedi. 97,6 shaqyrym jol men 4 kópir (13 nysan) kúrdeli jóndeýden ótip, 1147,9 shaqyrym jol men 8 kópir (460 nysan) ortasha jóndeýden ótetin bolady. Munan bólek, qazyna qarjysy oblystyq mańyzdaǵy 4330,3 shaqyrym avtomobıl joldary men 32 jobany ázirleýge (426,8 shaqyrym) uqsatylmaq", - deıdi baspasóz qyzmetindegiler.
Olardyń aıtýynsha, 2016 jyly 305 nysan nemese 640,9 shaqyrym jol men kósheler jáne aıaqjoldardyń qurylys-jóndeý jumystary júrgizilgen edi. Taratyp aıtsaq, uzyndyǵy 30,8 shaqyrym jol (6 nysan) jańadan salynsa, 27,1 shaqyrym jol (17 nysan) qaıta jańarýdan ótti. 23 nysanǵa (148,6 shaqyrym) kúrdeli jóndeý jumystary jasalsa, 259 nysan (434,4 shaqyrym) ortasha jóndelgen.
Al byltyr Shymkent qalasynyń Qapal batyr kóshesindegi 1 temirjol ótkeli men oblys aýmaǵyndaǵy 17 kópir paıdalanýǵa tapsyrylǵan eken.