Qurlyqtyq hokkeı lıgasynyń pleı-off kezeńinde Astananyń «Barysy» Chelıabiniń «Traktoryn» qabyldap, 1:2 esebimen ese jiberdi.
«Barys Arenada» ótken kezdesýde jankúıerler tartysty oıynnyń kýási boldy. Qos komanda alma kezek shabýyldar uıymdastyrǵanmen, alǵashqy shaıba tek ekinshi kezeńniń ortasyna taman soǵyldy. 32-mınýtta Pol Shehýranyń nátıjeli soqqysynan keıin «Traktor» alǵa shyqty.
Qonaqtar alǵash bolyp esep ashsa da, basymdyqty arttyrý úshin baryn saldy. Alaıda, Edýard Zankoves shákirtteri 54-mınýtta áýpirimdep júrip tarazy basyn teńestirdi. Bul tusta Naıdjel Doýs mergendigimen tanyldy. Negizgi ýaqytta osy esep tirkelip, jeńimpaz komanda overtaım arqyly anyqtaldy. О́kinishke oraı, jerlesterimiz birinshi bolyp jiberip aldy. 66-mınýtta Alekseı Petrov dál soqqy baǵyttap, komandasyna jeńis syılady.
Qos komandanyń arasyndaǵy teke-tireste jalpy esep 2:2 boldy. Endigi match 2 naýryz kúni «Traktordyń» aıdynynda ótedi.