Dana halyqtyń darqandyǵy

Tatıana Ivanovnanyń ata-anasy qazaq jerine tyń kóterý jyldary kelgen eken. Jastar osynda bas qosyp, qazaq halqyna da baýyr basady. Ol kezde de ońaı bolǵan joq, ushy-qıyrsyz dalada mańdaıy kúnqaqty bolyp eńbek etti. Ata-anasyn osy ulan dalada ustap qalǵan qazaq halqynyń baýyrmaldyǵy, qonaqjaılylyǵy, dos degende «jalǵyz atyn berip, júgen ustap qalatyn» márttigi edi. Qostanaı tóńiregi, onyń ishinde óz­de­rine qut meken bolyp qalǵan Jitiqara je­­rinde ózderi sekildi kóp ulttyń ókilderi tur­­dy. Barlyǵy da keńqoltyq qazaq hal­qynyń meıirim-shýaǵyna bólenip keledi. Tatıana osy jerde týyp-ósti, otbasyn qurdy, bilim aldy. Qazir bir emes, eki joǵary bilimi bar. Jitiqara qalasynyń irgesindegi Prıgorodnyı mektebinde dırektordyń oqý-tárbıe isi jónindegi orynbasary bolyp qyzmet isteıdi. Aýyl balalarynyń sapaly bilim alýy úshin bilimin de, biligin de sarp etedi. Tatıana Ivanovnanyń Ýkraına jerinde týǵan-týystary, aǵaıyndary bar. Biraq olarmen hat-habar bolmasa, barys-kelis baıaǵyda azaıǵan. – Búgin men eń aldymen qazaq jeri úshin, qazaq jerinde qalyptasqan taǵ­dy­rym úshin, Elbasynyń beıbit saıasaty úshin alǵys aıtamyn! Biz «búgin ne bolyp qalady, erteńgi kúnim ne bolady?» dep alań­damaı, beıbit ómirge úırengenbiz. Meniń aǵaıyndarym Ýkraınadaǵy qaq­ty­ǵysqan, ańdysqan ómirde turyp ja­tyr. Tynyshtyq bolmaǵan soń, tur­mys­ta­ry da onsha emes, kedeıshilik jaılaǵan, – deıdi Tatıana Ivanovna. Qazaqstanda ózge ult ókilderiniń tilin, dástúrin umytpaýyna, qaıta olardy da­my­­týǵa bar múmkindik jasalyp otyr. Bul qurǵaq saıasat emes, ómirdiń shynaıy kó­ri­nisi ekenin Tatıana óz tájirıbesinen bi­ledi. Ol Jitiqaradaǵy ýkraın ulttyq-má­denı ortalyǵynyń jetekshisi. Olar ja­qynda ǵana qalada ýkraın dástúri men má­denıetiniń mýzeıin ashty. Tatıananyń qyzy Aleksandra qazir Qostanaı qalasynda ýnıversıtette oqı­dy. Qazaq tilin kádimgideı meńgergen. Qy­zy­nyń jetistigin Tatıana da maqtanysh etedi. – Qazaqtarda «batamenen el kógeredi», «Jaqsy sóz – jarym yrys» degen naqyl sóz bar. Bul halyqtyń danalyǵy keremet qoı. Batanyń ózi tek tilek emes, adamdar­dy jaqsylyqqa baǵyttap otyratyn tár­bıe kózi. Dostarymyz, kórshilerimiz bar, aralasyp-quralasyp jatamyz, qazaq­tar­dyń osy dástúrine basymdy ıemin. Qy­zymnyń qazaq tilin erkin meńgergenine qýa­namyn, óıtkeni, halyqtyń batasyn, úl­­kenderdiń alǵysyn shynaıy túsinetin bo­lady, júrekpen sezinedi. Men óz qyzyma da, mekteptegi oqýshylaryma da ata-baba aldynda keshirim surap júrýdi úıretemin, – dedi Tatıana Koshelıýk. Názıra JÁRIMBETOVA, «Egemen Qazaqstan» Qostanaı oblysy, Jitiqara qalasy