Qazaq KSR Ishki Ister Halyq Komıssarıatynyń málimeti boıynsha 1937 jyly Qazaqstanǵa 90 eshelonmen 20 789 otbasy, 98 454 koreı ultynyń ókilderi kóshirilip ákelingen eken. Sonyń bir úlken bóligi Syr boıyna qonystandyryldy. Men ol kezde bar joǵy 11-12 jastaǵy bala edim. Osy ýaqyttan bastap Syr óńirindegi koreı halqynyń tarıhy bastaldy.
Ol kezdegi saıası-áleýmettik jaǵdaıdyń qazaq halqy úshin de ońaı soqpaı turǵanyn kózimmen kórdim. Halyqty qulazytyp ketken asharshylyq, halyq jaýy degen jalǵan aıyptar taǵylyp, saıası repressııalardyń júrgizilýi sonyń kýási edi.
Bizder de qazaq halqynyń qurmetine saı bolý úshin elge, jerge degen yqylasymyzdy bildirý maqsatymen bilek sybana eńbekke aralastyq. Ásirese, kúrish ósirý sharýashylyǵynda aıtarlyqtaı jetistikterge qol jetkizildi. Osy eńbekterimizdi elegen basshylyq oblys boıynsha koreı ultynyń 28 azamatyna Eńbek Eri ataǵyn berdi. Bul jergilikti halyqtyń keń peıilinen dep bilemiz.
Syr boıyn qonystap, órken jaıǵan bizderge aǵa urpaq ókilderi atap aıtsam, koreı halqynyń ulttyq batyry Hom Bom Do, aǵartýshy-ǵalym Ge Bon Ý jáne t.b. úlgi-ónege kórsetip, qazaq halqymen baýyrlastyqtyń joǵary dárejesin kórsetti. Olar Alashtyń anasyna baǵalanǵan qasıetti mekende máńgilik panalaryn tabýy da sonyń aıǵaǵy.
Qazirgi tańda bizge eń qymbaty – aýyzbirshilik, eldegi tatýlyq. Búginde Qazaq halqynyń yqylasy men darqan kóńiliniń arqasynda kósegemiz kógerip, ósip-ónip jatyrmyz. Basymyzǵa kún týyp, zulmat kúndi bastap keshkende baýyryna basqan eldiń biz úshin jaqsylyǵy ushan-teńiz.
Ge Hak Rım,
«Qazaqstan koreıler qaýymdastyǵy Qyzylorda oblystyq fılıaly» aqsaqaldar keńesiniń tóraǵasy
QYZYLORDA