Búgin naýryzdyń birinshi kúni Qazaqstan halqy Alǵys aıtý kúni merekesin atap ótýde.
2015 jyldyń 15 qańtarynda Memleket basshysy Nursultan Nazarbaev «Qazaqstan Respýblıkasyndaǵy kásiptik jáne ózge de merekeler týraly» Qazaqstan Respýblıkasy Prezıdentiniń 1998 jylǵy 20 qańtardaǵy № 3827 Jarlyǵyna ózgeris jáne tolyqtyrý engizý týraly» Jarlyǵyna qol qoıdy. Oǵan sáıkes, 1 naýryz - Alǵys aıtý kúni bolyp bekitildi. 1995 jyldyń 1 naýryzy kúni Qazaqstan halqy Assambleıasy qurylǵan bolatyn. 2015 jyly Assambleıanyń 20 jyldyǵy kezinde Memleket basshysy bul kúndi Alǵys aıtý kúni dep jarııalaýdy usyndy. Osylaısha, eldegi barlyq etnostardyń ókilderi bir-birine jáne qazaqtarǵa alǵys aıta alady.
«Stalındik rejım kezinde túrli jyldary Qazaqstanǵa kóptegen halyqtar jer aýdaryldy - 800 myńǵa jýyq nemis, 102 myń polıak, 550 myń Soltústik Kavkaz halqynyń ókilderi, 18,5 myń Qıyr Shyǵystaǵy koreı otbasylary kóship kelýge májbúr boldy. Olardy poıyz vagondarynan japan dalaǵa túsirip ketti. Ol kezderi munda tek qazaqtar ómir súrdi. Sondyqtan, olar qabyl alyp, kómek kórsetti. Qıyn ýaqyttardy bastan ótkerip júrgen qazaq otbasylary balshyq úılerine kirgizip, qabyldady. Bizdiń januıamyz da úsh balasy bar erli-zaıyptyny qabyldady. Qazaqstan halqy Assambleıasynyń qurylǵan kúnin - 1 naýryzdy jyl saıyn barlyq etnostardyń bir-birine jáne meıirimdilik kórsetip, túrli halyqtardy týǵanyndaı qabyldaǵan qazaqtarǵa Alǵys aıtý kúni dep atap ótken durys bolar edi. Bul bizdi odan ári jaqyndastyrar edi. Bul kún barlyq qazaqstandyqtardyń bir-birine meıirimdilik, dostastyq jáne mahabbat tanytý merekesi bola alady», - dep málimdedi QR Prezıdenti Nursultan Nazarbaev 2015 jyldyń 22 sáýiri kúni QHA-nyń XXII sessııasy kezinde sóılegen sózinde.