Qazaqstannyń ózine tán saıası modeli - turaqty prezıdenttik bılik saqtalady. Bul týraly búgin Qazaqstan Parlamenti palatalarynyń birlesken otyrysy barysynda Elbasy Nursultan Nazarbaev málim etti.
«Jańa jaǵdaıda Parlamentke, Úkimetke, barlyq atqarýshy organdarǵa zor jaýapkershilik júkteledi. Saıası jańǵyrtý konstıtýsııalyq reformalar arqyly naqty júzege asyrylatyn bolady. Bir aıqyn másele - Qazaqstannyń ózine tán saıası modeli, ıaǵnı turaqty prezıdenttik bılik saqtalady. Sonymen birge Parlament pen Úkimettiń ókilettikteri neǵurlym keńeıip, olardyń róli arta túsedi. О́zimniń tájirıbeme súıene otyryp aıtaıyn, ókilettikti tıimdi qoldanýdyń ózi asqan óner. Bizdiń prezıdenttik bılik jaıynda osy jyldardyń ishinde ózimizde de, syrtta da neshe túrli sóz aıtylǵanyn bilemiz. Biraq biz eń aldymen ózimizge, qazaqstandyqtarǵa, halqymyzǵa ne kerek, sonymen júrdik. Osy naǵyz durys jol. Bul qajyrly eńbek pen yjdaǵattylyqty qajet etedi», - dedi Prezıdent.
Memleket basshysy saıası jańǵyrýdyń tehnologııalyq jańǵyrýmen qatar qolǵa alynýy aıryqsha mańyzdy ekendigin basa aıtty.
«Olar birin-biri kúsheıte, tolyqtyra túsýi qajet. Konstıtýsııalyq reforma 5 saladan turatyn ult josparymen jáne jaqynda jarııalanǵan úshinshi jańǵyrýmen qatar júzege asýy tıis. Bir-birimen jalǵasyp jatady. Meniń Joldaýymda aıtylǵan mindetter zań shyǵarýshy, atqarýshy organdarǵa erekshe jaýapkershilik artady. Jańa jahandyq jaǵdaıda memlekettiń strategııalyq baǵdary ózgermeıdi. Bizdiń mejemiz damý kóshiniń basyndaǵy 30 eldiń qatarynda bolý. Negizgi maqsat - sol. Saıası jáne tehnologııalyq jańǵyrýdyń maqsaty da osy», - dedi Nursultan Nazarbaev.