Úkimet Prezıdenttiń sharýashylyq basqarý salasyndaǵy 35 ókilettigin tómengi deńgeıge berý jóninde zań jobasyn daıyndaıdy. Bul týraly búgin ótip jatqan Parlament palatalarynyń birlesken otyrysynda Qazaqstan Respýblıkasynyń prezıdenti Nursultan Nazarbaev aıtty.
«Ondaǵy ózgerister qoǵamdy ary qaraı demokratııalandyrýǵa baǵyttalǵan. Parlamenttiń rólin arttyryp, Úkimettiń derbestigi men jaýapkershiligin kúsheıtýge arnalǵan jobalar. Ol quqyq qorǵaý, sot júıesi, konstıtýsııalyq baqylaýdyń negizderin de jetildiredi. Sonymen bul jobada Parlament talqylaýyna Konstıtýsııanyń 23 babyna ózgerister usynylyp otyr. Zańdar da uzamaı Parlamentke engiziletin bolady. Biz osy zańdar arqyly bılik tarmaqtary men olardyń arasyndaǵy ókilettikterdi barynsha tıimdi etip qaıta bólemiz. Osynyń barly jahandyq jáne óńirlik syn-qaterlerge ýaqytyly jaýap berip, aldyn alý úshin jasalýda», - dedi Elbasy.
Nursultan Nazarbaevtyń aıtýynsha, konstıtýsııalyq reforma 5 saladan turatyn ult josparymen jáne jaqynda jarııalanǵan úshinshi jańǵyrýmen qatar júzege asyrylýy tıis. "Meniń Joldaýymda aıtylǵan mindetter zań shyǵarýshy, atqarýshy organdarǵa erekshe jaýapkershilik artady. Jańa jahandyq jaǵdaıda memlekettiń strategııalyq baǵdary ózgermeıdi. Bizdiń mejemiz damý kóshiniń basyndaǵy 30 eldiń qatarynda bolý. Negizgi maqsat - sol. Saıası jáne tehnologııalyq jańǵyrýdyń maqsaty da osy», - dedi Nursultan Nazarbaev.