«Qaırat» fýtbol klýbynyń bas jattyqtyrýshysy Kahaber Shadadze Qazaqstan Sýperkýbogy úshin «Astanamen» ótetin match jaıly oı bólisti.
«Mine, jańa maýsym da bastalaıyn dep qaldy. Bul jyl da ádettegideı tartysty ótedi dep senemin. Al búgingi jattyǵýǵa keler bolsaq, aýa raıyna baılanysty josparymyzdy ózgertýge týra keldi. Sol úshin jattyǵý jumystary bazamyzda ótedi», – dedi Shadadze.
Qazaqstan Sýperkýbogynyń sońǵy eki oıyny dál osy komandalar arasynda ótken bolatyn. Ekeýinde de jeńimpaz komanda penaltı serııasy arqyly anyqtalǵan.
«Penaltı serııasyna emes negizgi 90 mınýtqa kóńil bólemiz. Erteń alańǵa shyǵatyn negizgi quramdy da josparlap qoıdym», – dedi ol.
«Astananyń» oqý-jattyǵý jıyndarynda ótken joldastyq kezdesýleriniń birine Kahaber Shadedzeniń baryp kórgeni habarlanǵan. Elordalyqtardyń oıyn mánerinde qandaı ózgerister bolǵan eken?
«Olardyń ózindik fılosofııasy bar. Komandanyń oıyny aıtarlyqtaı ózgergen dep aıta almaımyn. Biraq olarǵa jańadan Ivan Maevskıı men Azdren Lýlaký keldi. Azdrenniń oıyny unady. Aıyp alańynda baryn salyp oınaıdy eken. Sondaı-aq, jas talant Dıdar Jalmuqandy erekshe ataýǵa bolady. «Astana» qaıta kúsheıe túskendeı áser qaldyrdy», – dedi «Qaırat» jattyqtyrýshysy.
Esterińizde bolsa, qos komandanyń arasynda ótken el Kýbogynyń fınalynda toqtaýsyz qar jaýyp, «Qaırat» óz oıynyn kórsete almaǵan. Almatyǵa mine, taǵy da qar jaýdy.
«Aýa raıy bárine birdeı. Astanalyqtarmen ótken sońǵy oıynda aýa raıy keri áserin tıgizgeni anyq. Biraq bul joly sáttilik bizdiń jaqta bolyp, jankúıerlerimizdi qýantamyz degen úmittemin. «Astanany» qas dushpanymyz dep eseptemeımin. Biz tek alańda ǵana bir-birimizge qarsylaspyz», – dedi bas bapker.
Almatylyqtardyń sapyn aldaǵy ýaqytta taǵy bir shabýylshy tolyqtyrýy múmkin.
«Qysta laıyqty fýtbolshy tabý qıyn. Arnaıy top osy jumystarmen aınalysyp jatyr. Komandaǵa taǵy bir joǵary deńgeıli shabýylshy qajet. Al Baýyrjan Turysbekke keler bolsaq, alańdaǵy rólin aýystyrdyq. Qazir shabýyl shebinde oınaıdy. Deńgeıine kóńilimiz tolady. Bizde birinshi nemese ekinshi quram dep bólinbeıdi. Ár oıynshymyz biz úshin mańyzdy. Kim daıyn sol alańǵa shyǵady», – dedi ol.
Aıta keteıik, «Qaırat» pen «Astana» arasyndaǵy match 4 naýryz kúni Almaty qalasyndaǵy Ortalyq stadıonda saǵat 15:00-de ótedi.