Búgin QR Parlamenti palatalarynyń birlesken otyrysynda «Qazaqstan Respýblıkasynyń Konstıtýsııasyna ózgerister men tolyqtyrýlar engizý týraly» QR Zańy qabyldandy, dep habarlaıdy QazAqparat. «Qurmetti depýtattar, qurmetti shaqyrylǵan qonaqtar sonymen biz Elbasymyz N.Nazarbaevtyń usynystaryn negizge alyp, Konstıtýsııamyzǵa engizilgen barlyq ózgeristerdi qabyldadyq. Osy tarıhı sheshimmen barshańyzdy shyn júrekten quttyqtaımyn», - dedi Májilis tóraǵasy Nurlan Nyǵmatýlın.
Aıta keterligi, otyrys barysynda Konstıtýsııalyq reforma jónindegi zań jobasyn ekinshi oqylymǵa daıyndaý jónindegi birlesken komıssııa tóraǵasy Nurlan Ábdirov negizgi baıandama jasap, Ata zańymyzǵa engiziletin ózgerister men tolyqtyrýlar Májilis pen Senattyń turaqty komıtetterinde, saıası partııalardyń fraksııalarynda talqylanyp, barlyq usynystar birlesken komıssııaǵa berilgendigin atap ótti jáne olardy jarııa etken bolatyn.