Qazaqstan Respýblıkasynyń Investısııa jáne damý mınıstrliginiń Geologııa jáne jer qoınaýyn paıdalaný komıtetiniń tóraǵasy Bazarbaı Nurabaev basshylyq etken qylmystyq toptyń qyzmeti áshkerelendi, dep habarlady Sybaılas jemqorlyqqa qarsy is-qımyl ulttyq bıýrosy. Vedomstvonyń habarlaýynsha, Nurabaev Qazaqstan Respýblıkasynyń terrıtorııasy boıynsha jer qoınaýyn paıdalanýǵa kelisimshart jasaý úshin kásipkerlerden asa iri kólemde para alý úshin qylmystyq jospar qurǵan.
"Bul qylmystyq josparǵa Komıtet tóraǵasynyń senimdi ókili - orynbasary N.Qurbanov, "Qazjerqoınaýy" jáne "Iýjkaznedra" RMK basshylary A.Nurjaýbaı men E.Ádilhanov, "Kazgeoınform" MB basshysy A.О́tegenov, Mańǵystaý oblystyq geologııa ınspeksııasynyń basshysy B.Mýtan, sondaı-aq, Komıtettiń qurylym bólimsheleriniń basshylary tartylǵan", - delingen habarlamada. Sonymen qatar, B.Nurabaevtyń senimdi ókili M.Ábdrashev (synyptasy) sybaılasy bolǵan delinedi.
6 naýryzda B.Nurabaev "Akmola Gold" JShS ókilinen memlekettik jer qoınaýyn zertteýge kelisimshart jasasýǵa kómekteskeni úshin kezekti ret 20 myń AQSh dollary kóleminde para alyp jatqan jerinen ustalǵan. Sonymen qatar, B.Nurabaev pen M.Ábdrashev para retinde 25 myń dollar bolatyn AUDI Q7 kóligi men Shymkentte quny 25 myń dollar bolatyn 3 bólmeli úı alǵan. Bul múlikter Ábdrashevtiń ulynyń atyna jazylǵan. Sonymen qatar, onyń "SKPetroleum" JShS ókilinen 20 myń dollar alǵany anyqtalǵan. Munymen birge, ol Shyǵys Qazaqstan, Jambyl jáne Qaraǵandy oblystaryndaǵy jer qoınaýyn paıdalanýshylardan kelisimshart jasasýda lobbılegeni úshin taýar-materıaldyq qundy zattar alǵany anyqtalyp otyr. Komıtet basshysy aldy delingen jalpy para kólemi - 100 myń AQSh dollary.
Sotaldy tergeý jalǵasyp jatyr.