Bıyl Ulystyń uly kúni – 22 naýryz merekesi Ońtústik Qazaqstan oblysynda jyldaǵymen salystyrǵanda erekshe ótpek. Dáliregi túrki elderinen keletin mártebeli meımandar Túrkistanda bas qosady.
Byltyr Túrkistan Túrki áleminiń 2017 jylǵy mádenı astanasy bolyp tańdalǵany belgili. Mundaı mártebege buǵan deıin Astana, Túrkııanyń Eskishahar, Tatarstannyń Qazan, Túrikmenstannyń Mary jáne Ázerbaıjannyń Shekı qalasy ıe bolǵan. Eldiń abyroıyn asyratyn bul jaýapkershilikti jaqsy sezine bilgen TÚRKSOI Halyqaralyq uıymy, Mádenıet jáne sport mınıstrligi, Ońtústik Qazaqstan oblysynyń ákimi Janseıit Túımebaev tarapynan atalǵan joba aıasynda atqarylatyn is-sharalardyń jospary bekitilgen. Túrkistanda bıyl 40 shaqty aýqymy zor mádenı is-shara josparlanýy osynyń aıǵaǵy.
– 21 naýryzǵa josparlanǵan «Naýryznamaǵa» 22 túrkitildes elden shaqyrylǵan myńǵa jýyq adam qatysady. 230-dan astam óner ujymy shaqyrylǵan. Sondaı-aq, elimizdiń 16 oblys, qalalarynan jáne oblystyń barlyq aýdan, qalalarynan arnaıy delegasııalar qatysady, – dedi oblystaǵy áz-Naýryzǵa ázirlik sharasyna toqtalǵan Ońtústik Qazaqstan oblysy ákiminiń orynbasary Ulasbek Sádibekov óńirlik kommýnıkasııalar qyzmetinde ótkizgen brıfıngte. Osy shara barysynda Túrkistanda Q.A.Iаsaýı atyndaǵy HQTÝ-dyń Mádenıet ortalyǵynda resmı qonaqtardyń qatysýymen «Túrkistan jáne túrkologııa» atty halyqaralyq ǵylymı-teorııalyq konferensııa ótedi.
Jalpy, bıyl Naýryz merekesi Ońtústikte bir apta toılanady. Is-sharalardyń legi 15 naýryzda «Naýryz patıdan» bastaý almaq. Bul sharanyń aıasynda túrli ult ókilderi naýryz kóje daıyndaýdan jaryssa, Ulttyq óner kúninde qolónershilerdiń qolynan shyqqan kádesyılardyń jármeńkesi uıymdastyrylady. Ulttyq anımasııa men kınotýyndylardyń kórsetilimi de osy ekinshi kúnge belgilenip otyr. 17 naýryzda «Qosh keldiń, áz-Naýryz» merekelik sharasy aıasynda joǵary jáne orta arnaýly oqý oryndary men mektepterde jastardyń boıynda patrıottyq sezimdi qalyptastyratyn túrli merekeler ótedi. Tazalyq aksııasy men qaıyrymdylyq sharalaryna da bir-bir kún arnalady. 19 naýryzda jurt Ulttyq ónimderdiń jármeńkesine barady.
Ulystyń uly kúnin toılaý 22 naýryzda Shymkenttegi Naýryz alańynda jalǵasady.
Ǵalymjan ELShIBAI,
«Egemen Qazaqstan»