Túrkııanyń Ystanbul qalasynda ótken kúresten 45-shi «Iаshar Dogý» Halyqaralyq týrnırinde balýan qyzdarymyz 2 kúmis, 4 qola medal jeńip aldy, dep habarlaıdy QazAqparat.
Bul dástúrli týrnırge bıyl áıelder kúresi tuńǵysh ret qosylǵan bolatyn. Jarystyń birinshi kúni arýlarymyz eki qola medal ıelendi. Alǵashqysyn 48 keli salmaqta Irına Borısova jeńip alsa, ekinshisin 69 keli salmaqta synǵa túsken Jámıla Baqbergenova qanjyǵasyna baılady.
Al jarystyń ekinshi kúni qyzdarymyz tórt medal ıelendi. Onyń ekeýi – kúmis, ekeýi – qola medal.
Kúmisti 60 kelide synǵa túsken Aıaýlym Qasymova men 75 kelide beldesken Gúlmaral Erkebaeva jeńip alsa, eki qolany 53 kelide baq synaǵan Juldyz Áshimova men 60 kelide el namysyn qorǵaǵan Altynaı Satylǵan jeńip aldy.