500 komanda bilim jarystyrdy

Bıylǵy doda buǵan deıingi maýsymdardan erekshe ótti. Olaı deıtinimiz, alǵash ret elimizdiń ár óńirinen 500 komanda qatysyp, jalpy sany 2 500 jas bir alańda bas qosty. Sharany uıymdastyrýshy Túrkistan oblysy qoǵamdyq damý basqarmasy «Jastar resýrstyq ortalyǵy» KMM-niń basshysy Ernar Bektaev osyndaı bas­tamalar arqyly bilimdi, belsendi, jan-jaqty jastardyń qataryn kóbeıtý kózdelip otyrǵanyn atap ótti. «AL-FARABI» ıntellektýaldy oıyny aldaǵy ýaqytta jalǵasyn taýyp, aýqymyn keńeıte beretinine senim bildirdi.

Intellektýaldy oıynnyń al­ǵash­qy irikteý kezeńi Kentaý qalasynyń ortalyq alańynda ótti. Ashyq aspan astynda uıym­das­tyrylǵan aýqymdy dodaǵa qaty­sýshylar bilim, logıka, tarıh, ádebıet, geografııa, mádenıet jáne ózge de baǵyttar boıynsha synǵa tústi. Ár komanda ýaqytpen sanasa otyryp, qoıylǵan suraqtarǵa naqty ári jyldam jaýap berýge tyrysty. Irikteý kezeńiniń ózinde básekeniń deńgeıi joǵary boldy. Komanda­lar arasyndaǵy upaı aıyrmashylyǵy óte az bolǵandyqtan, sońǵy suraq­tarǵa deıin tartys saqtaldy. Qatysý­shylardyń bilim deńgeıi, jyldam oılaý qabileti jáne ózara úılesimi olardyń kelesi kezeńge ótýine tikeleı áser etti. Úzdik nátıje kórsetken 45 komanda kelesi kezeńge joldama aldy.

Túrkistan qalasynda jalǵas­qan zııatkerlik oıynnyń kelesi kezeńderinde báseke kúsheıip, suraqtardyń kúrdelilik deńgeıi arta tústi. Al aqtyq kezeńde qaty­sýshylardyń daıyndyq deńgeıi, jyldam oılaý qabileti jáne koma­nda músheleriniń bir-birimen úılesimdi áreket etýi anyq baıqaldy. Fınal qorytyndysy boıynsha I oryndy Saıram aýdanynan kelgen «IQ Elite» komandasy jeńip aldy. II oryndy Almaty qalasynyń «A team» komandasy ıelense, III oryn Keles aýdanynan kelgen «Keles Oilap» komandasyna buıyrdy.

Jeńimpazdar men júldeger­lerge jalpy kólemi 3 mıllıon teńge júlde qory tabys­taldy. Sonymen qatar qatysýshy koman­dalarǵa yntalandyrý syılyqtary berildi.

TÚRKISTAN