Ońtústik Qazaqstan oblysynyń ákimi Janseıit Túımebaev reseılik «Kosmos-Neft-Gaz» qarjylyq-ónerkásiptik kompanııasynyń prezıdenti Ivan Lachýgınmen jáne qazaqstandyq «Saýts-Oıl» kompanııasynyń prezıdenti Serikjan Seıitjanovpen kezdesti.
«Ońtústik Qazaqstanda sheteldik ınvestorlar úshin bar jaǵdaıdy jasaýǵa ákimdik jaǵy tolyqtaı ázir. Búginde oblysta 11 ındýstrıaldy aımaqta 151 ınvestısııalyq joba júzege asyrylyp jatsa, «Ońtústik» arnaıy ekonomıkalyq aımaqta 10 iri kásiporyn jumysyn júrgizip jatyr. Munan bólek, aımaqtaǵy salalarǵa qarjy salǵan ınvestorlar úshin salyqtan bosatý syndy jeńildikter bar», – dedi óńir basshysy.
Jıynda I.Lachýgın men S.Seıitjanov aımaq basshysyna birlesken joba ázirlep jatqanyn, Eýro-5 standarty boıynsha munaı hımııa kombınatyn salý jumysyn qolǵa alýdy josparlap otyrǵanyn aıtty. Jospar boıynsha jańa zaýyt jylyna 2 mln tonna shıkizatty qaıta óńdeýge qaýqarly.
Baqtııar TAIJAN,
«Egemen Qazaqstan»