Bıyl Shyǵys Qazaqstannyń barlyq aýdandaryndaǵy quqyq qorǵaý salasynyń qyzmetkerlerine jıyny 143 avtokólik, zamanaýı rasııalar, beıne regıstratorlar jáne О́skemendegi jedel járdem aýrýhanasyna «Mersedes» bazasyndaǵy eki reanımobıl men 11 «Folksvagen» kóligi satylyp alynbaq. Bul jaıynda oblystyq máslıhattyń kezekten tys sessııasynda málim boldy.
Oblystyq ekonomıka jáne bıýdjetti josparlaý basqarmasynyń basshysy Almashan Smatlaevtyń aıtýynsha, aımaqtaǵy fermerlerge sýbsıdııa úshin 1 mlrd. 383 mln, ishki ister salasyna 1 mlrd. 356 mln, densaýlyq saqtaý salasyna 800 mln. teńge qarjy bólinedi.
«О́ńirdiń quqyq qorǵaý jáne densaýlyq saqtaý salalarynyń materıaldyq-tehnıkalyq bazalaryn jańǵyrtýǵa erekshe kóńil bólinip otyr. Esterińizde bolsa, byltyr oblys basshysy Danıal Ahmetov О́skemen qalasynda zamanaýı úlgidegi medısınalyq járdem kórsetý maqsatyndaǵy kólikterdiń paıda bolatyndyǵyn aıtqan bolatyn. Endi mine, oblys ortalyǵyna zamanaýı úlgidegi kólikter satylyp alynbaq. Munyń syrtynda О́skemen qalasynda bir, Semeıde eki aýrýhanaǵa kúrdeli jóndeý jumystary júrgiziledi. Budan bólek, 50 dáriger Semeı medısınalyq ýnıversıtetiniń bazasynda aǵylshyn tilinen bilimin jetildiredi», – dedi basqarma basshysy.
Azamat QASYM,
«Egemen Qazaqstan»