Kórmeni uıymdastyrýshy — Qazaqstan Respýblıkasyndaǵy Túrkııa Respýblıkasynyń Elshiligi jáne elordadaǵy «Júnis Ámire» túrik mádenıeti ortalyǵy.
Sharada sóz sóılegen Qazaqstan Respýblıkasy Parlamenti Májilisiniń depýtaty Saýytbek Abdrahmanov Shanaqqala shaıqasynyń tarıhı orny erekshe ekenin aıtty.
«Ár eldiń tarıhyndaǵy azattyq úshin kúreste erekshe mańyzdy shaıqastar bolǵan. Qazaq tarıhynda Ańyraqaı shaıqasynyń orny qandaı bolsa, túrik jurty úshin Shanaqqala shaıqasynyń orny sonshalyq mańyzdy. Bul shaıqas birinshi dúnıejúzilik soǵystyń baǵytyn ózgertti. Osydan týra eki jyl buryn, 16 naýryzda Túrkııa Prezıdenti Redjep Taıyp Erdoǵannyń Qazaqstanǵa sapary bastaldy. Sol kezde «Egemen Qazaqstan» gazetinde Shanaqqala shaıqasy týraly úlken maqala jarııalandy. Redjep Taıyp Erdoǵannyń «Shanaqqala óz aldyna úlken epos» degen sózi bar. Shynymen de, bul shaıqasta túrik jurty úlken erlik kórsete bildi» dedi depýtat.
О́z kezeginde Túrkııa Respýblıkasynyń Qazaqstandaǵy Tótenshe jáne О́kiletti Elshisi Nevzat Ýıanyk búgingi sharanyń eki el arasyndaǵy dıplomatııalyq baılanystyń 25 jyldyǵyna oraı uıymdastyrylǵanyn aıta kele, eki el arasyndaǵy baılanystyń odan ári jańa deńgeıge kóterile berýine tilektestigin bildirdi.
«Shanaqqala shaıqasynan túrikterdiń ult-azattyq soǵysy bastaý aldy. Ol jeńistiń arqasynda túrik jurty óziniń táýelsizdigin saqtaı otyryp, Mustafa Kemal Atatúriktiń basshylyǵymen álem tarıhynda ózindik rólin bekitti», — dedi Elshi.