Dmıtrıı Selıýk «Sport-Ekspress» basylymyna bergen suhbatynda reseılik klýbtarǵa Granatkın týrnırinde erekshe oıynymen kózge túsken 17 jastaǵy fýtbolshyǵa nazar aýdarýdy, sondaı-aq azamattyq alyp berip, ulttyq quramaǵa shaqyrýdy keńes etti.
«Granatkın týrnırinde Erkebulanǵa qyzyǵýshylyq tanytqan birneshe klýb bolǵany ras. О́zderińiz bilesizder, «Zenıttiń» jastarymen birge birneshe oıynǵa qatysyp, ózin jaqsy qyrynan kórsete bildi. Qazir «Tarazdyń» oıynshysy. Endi oǵan juldyz aýrýyna shaldyǵyp qalmaı, tynbaı jattyǵýy qajet. Mundaı ataq jastarǵa keri áserin tıgizetini aıdan anyq. Al ózge eldiń quramasyna shaqyrǵysy kelip júrgen agentterge jumystaryn tek klýbtyq deńgeıde oryndaýdy keńes etemin. Biz Qazaqstan ulttyq quramasy úshin ǵana jastardy daıyndaımyz», – dedi Aleksandr Kýznesov.
«Byltyr Tarazda birneshe oıynshyny syrttaı baqyladym. Erkebulan qatarlastarynan oq boıy alda júrdi. Alaıda, ulttyq quramanyń deńgeıine saı bolý úshin oǵan taktıkalyq ári psıhologııalyq turǵydan biraz daıyndyq kerek bolatyn. Oqý-jattyǵý jıyndary, ózge elderdegi jarystar oǵan úlken kómegin tıgizdi dep aıta alamyn. Árıne, negizgi quramǵa birden enip ketken joq. Granatkın týrnırinde ózin barynsha jaqsy qyrynan kórsetti», – dedi Qazaqstan jastar quramasynyń bas bapkeri.
Reseılik agent Dmıtrıı Selıýk Erkebulanǵa Ispanııanyń mamandary da nazar aýdara bastaǵanyn aıtqan bolatyn.
«Jasy 18-ge tolmaǵandyqtan «Tarazda» oınaıdy. Biraq aldaǵy ýaqytta deńgeıi joǵary chempıonattardyń birine aýysatynyna senimdimin. Bári Erkebulannyń óz qolynda. Bizde de komandany alǵa súırep, jeńiske jeteleıtin jastardyń shyǵyp kele jatqanyna qýanamyn. Olardyń alǵa jyljýy úshin barymyzdy salamyz», – dedi ol.
Aıta keteıik, Granatkın týrnırinen keıin Erkebulan Seıdahmetke «Zenıt» komandasynyń ókilderi qyzyǵýshylyqtaryn bildirip, jattyǵýǵa shaqyrdy. Pıterliktermen birge Italııada Viareggio Cup týrnırine qatysyp, tórt golymen kózge tústi. Biraq 18 jasqa tolmaýyna baılanysty FIFA-nyń erejesi boıynsha «Zenıtpen» kelisimshartqa otyra almaıdy.
Birneshe kún buryn ol «Taraz» fýtbol klýbymen birjyldyq kelisimshartqa qol qoıdy.