Osy oqıǵaǵa baılanysty Ortalyq kommýnıkasııalar qyzmetinde ótken brıfıngte Qazaqstannyń halyq ártisi, Memlekettik syılyqtyń laýreaty Asanáli Áshimov, kıno jáne teatr aktrısasy, Qazaqstannyń eńbek sińirgen ártisi Merýert О́tekeshova, Memlekettik respýblıkalyq koreı mýzykalyq komedııa teatrynyń dırektory Lıýbov Nı, Qazaqstan Respýblıkasynyń eńbek sińirgen qaıratkeri Erlan Bilál, «Qazaq áýenderi» AQ prezıdenti Ashat Maemırov atalǵan syılyqpen marapattaý rásimi týraly áńgimelep berdi.
Bul syılyq alǵash ret tapsyrylady. Saltanatty jıyn «Qazaqstan» ortalyq konsert zalynda Qazaqstannyń teatr qaýymdastyǵynyń ókilderiniń qatysýymen ótedi.
Brıfıngte halyq ártisi Asanáli Áshimov «Sahnager» syılyǵynyń máni men mańyzyna keńirek toqtalyp ótti.
–Búginde qazaq teatrlarynyń damý aýqymyn keńeıtý, álemdik teatr qurylymdarymen baılanystardy nyǵaıtý, jer-júziniń teatr kartasynda óz ornymyzdy aıqyndap, únimizdi laıyqty estirtýge atsalysý ónerge janashyr árqaısymyzǵa mindet. Osyǵan baılanysty Qazaqstan Teatrlary assosıasııasynyń bastamasymen «Sahnager-2017» ulttyq teatr syılyǵy taǵaıyndalyp otyr. Bul syılyq teatr dástúrin saqtaý men nyǵaıtýǵa arnalǵan. Marapattaý rásimi «Samuryq-Qazyna» Ulttyq ál-aýqat qory» AQ qoldaýymen ótedi, – dedi ol.
Odan keıin halyq ártisi Qazaqstan teatrlary assosıasııasynyń maqsaty týraly aıtyp berdi.
– Qazaqstan Teatrlary assosıasııasy 2016 jyly qurylǵan. Ol meniń azamattyq bastamam bolatyn. Qazirgi kezde qaýymdastyqqa respýblıkalyq teatrlardyń barlyǵy jáne kóptegen oblystyq teatrlar múshe bolyp otyr. Assosıasııa alǵashqy sharalaryn ótkizip te úlgerdi. Búginde jasy 100-den asqan qadirli sahnagerimiz, Qazaqstannyń halyq ártisi Aısha Abdýllınanyń 100 jyldyǵyn atap óttik. Aıaýly Aısha anamyzdyń ózi óner jolyn bastaǵan qara shańyraq M.Áýezov teatrynyń úlken sahnasynda otyryp – jas urpaqqa ulaǵatty sózin aıtýynyń ózi qandaı ǵanıbet! Al, ónerimizdiń bekzat tulǵasy, KSRO halyq artısi, KSRO Memlekettik syılyǵynyń laýreaty Hadısha Bókeevanyń týǵanyna 100 jyl tolýyna oraı ótkizilgen eske alý keshiniń de taǵlymy zor. Mundaı ulaǵatty sharalar Assosıasııanyń aldaǵy jumystarynyń josparly sharalary bolary anyq. Bizdiń qaýymdastyq memlekettik teatrlardyń ımıdjin qalyptastyrýǵa, teatr qyzmetiniń parasattyq áleýeti men múmkindikterin álemdik dárejege kóterý, teatrlar arasyndaǵy shyǵarmashylyq izdenis monıtorıngin qalyptastyrý, jańa esimderdi anyqtaý, jastardyń aǵa tolqyn ókilderinen tájirıbe alý, kásibı baǵdarlaryn aıqyndaý múmkindikterin birizdileý, áleýmettik-turmystyq jaǵdaılarlaryna qoldaý kórsetý, marapattarǵa usyný, teatr qaıratkerleriniń eske alý keshteri men mereıtoılaryn umyt qaldyrmaý, halyqaralyq festıvalder, álemdik master-klasstar men konferensııalar uıymdastyrý sekildi jalpy qazaq teatr óneriniń halyqaralyq deńgeıdegi múddesine qyzmet etetin, búgingi qazaq teatr ónerindegi ózekti negizgi baǵyttardy júzege asyratyn biregeı birlestik! Biz osy baǵyttaǵy jumysymyzdy ári qaraı jalǵastyramyz, – dedi ol.
Kezdesýde Qazaqstannyń eńbek sińirgen ártisi Merýert О́tekeshova Qazaqstan Teatrlary assosıasııasynyń prezıdenti bolyp Qazaqstan men KSRO Halyq ártisi, Memlekettik syılyqtar laýreaty, Reseı Federasııasynyń «M. Lomonosov» ordeniniń kavaleri, «Otan», «Dostyq» ordenderiniń kavaleri Asanáli Áshimov taǵaıyndalǵany barlyq óner súıer qaýymǵa maqtanysh ekenin, bıyl qaýymdastyqtyń «Sahnager-2017» syılyǵyn taǵaıyndaǵany bolashaǵynan úmit kúttiretin jastar úshin qyzyǵy men qıyndyǵy kóp óner jolynda ózin kórsetýge úlken múmkindik bolatynyn atap ótti.
– «Sahnager-2017» ulttyq teatr syılyǵy teatr óneri salasyndaǵy shyǵarmashylyq jetistikter úshin beriledi. Teatr qaýymdastyǵynyń pikiri boıynsha, syılyq qazaqstandyq patrıotızm men ulttyq mádenıetke degen súıispenshilikti nyǵaıtýǵa baǵyttalyp, eńbekke, kásibı jetistikke, Otanǵa qyzmet etýge, joǵarǵy patrıottyq ıdeıalarǵa oń kózqaras qalyptastyratyn týyndylardyń dúnıege kelýine yqpal etý tıis, – dedi M.О́tekeshova.
Sondaı-aq ol, «Sahnager» syılyǵy elimizdiń mádenı keńistigin biriktirip qana qoımaı, shyǵarmashylyq tájirıbemen turaqty almasý úshin jaǵdaı jasaıtynyn, ulttyq syılyq aıasynda jas daryndy ártisterdi qoldaýǵa erekshe nazar aýdarylatynyn aıtty.
–«Sahnager» syılyǵy «Jyldyń úzdik rejısseri», «Jyldyń úzdik qoıýshy-sýretshisi», «Jyldyń kostıým boıynsha úzdik sýretshisi», «Jyldyń jaryq boıynsha úzdik sýretshisi», «Úzdik áıel róli», «Úzdik er róli», «Jyldyń úzdik spektakli», «Jyldyń úzdik balalarǵa arnalǵan spektakli», «Jyldyń úzdik dramatýrgy», «Jyldyń úzdik grımeri», «Jyldyń úzdik teatr synshysy», «Spektakldiń úzdik mýzykalyq rásimdelýi», «Teatr ónerin damytýǵa qosqan úlesi úshin», «Jyl ashýy», «Úzdik opera jáne balet partııasy» nomınasııasynda úzdikterge tapsyrylady. Bıyl irikteý týryna Qazaqstannyń 52 teatr ujymy qatysty, – dedi ol.
Brıfıngte ónertanýshylar Erlan Bilál men Ashat Maemırov «Sahnager» syılyǵynyń alǵash ret beriletinin, ony tapsyrý úshin Bishkekten Qazaqstannyń halyq ártisi Aısha Abdýllınanyń arnaıy keletinin aıtty.
–Qazirgi kezde drama teatry kenje qalyp barady. Sondyqtan biz syılyqtyń aýqymyn keńeıtip, oǵan barlyq teatrlardy qostyq. Bul syılyq taetrlar men ártisterdiń jáne sonyń aınalasynda júrgen barlyq mamandardyń mártebesin kóteretinine senim mol, – dedi Ashat Maemırov.
Dastan KENJALIN,
«Egemen Qazaqstan»