Qaýlyǵa sáıkes, Ýkraınanyń kórmege qatysýy men daıyndyǵyn qamtamasyz etý maqsatynda Úılestirýshi komıtet quryldy, onyń tóraǵasy bolyp Vıse-premer – О́ńirlik damý, qurylys jáne turǵyn úı-kommýnaldyq sharýashylyǵy jónindegi mınıstr Genadıı Zýbko taǵaıyndaldy. Al keshe elordada Ýkraınanyń Qazaqstandaǵy elshiliginde Ýkraına isteri jónindegi ýaqytsha senim bildirilgen ókil Volodymyr Djıdjora jýrnalısterge arnaıy brıfıng ótkizip, óz eliniń bıyl Astanada ótetin aýqymdy kórmege daıyndyǵy jóninde jan-jaqty áńgimelep berdi.
Onyń aıtýynsha, álemniń basqa da elderi sekildi Ýkraınanyń da bul mańyzdy sharaǵa daıyndyq jumystary qyzý júrgizilip jatqan kórinedi. «Biz óz memleketimizdiń atynan Qazaqstanǵa EKSPO-2017 halyqaralyq kórmesine qatysýymyzǵa qoldaý kórsetip, kómek qolyn sozǵany úshin rızashylyǵymyzdy bildiremiz. Sebebi, ózderińiz biletindeı, elimizde kúrdeli jaǵdaı qalyptasqan. Sondyqtan, qazaqstandyq tarap bizdiń memleketke arnaıy pavılon bólip, úlken kórmege tegin qatysýymyzǵa múmkindik beretin ortaq sheshimge qol jetkizdik. Jalpy, Qazaqstan bizden bólek, onǵa jýyq elge dál osyndaı jaǵdaı jasap otyr eken. Qazir Ýkraınanyń pavılonyn qurýǵa «Astana EKSPO-2017» ulttyq kompanııasy septigin tıgizýde. Pavılondy daıyndaý, qurý, bezendirý, dızaınyn jasaý jumystaryn biz Qazaqstandaǵy dostarymyzben birlese qolǵa alyp jatyrmyz», – dedi V. Djıdjora.
Sondaı-aq, ol qazirgi tańda Ýkraınanyń ulttyq pavılonyn daıyndaý jáne kórme aıasynda bul eldiń Ulttyq kúnin uıymdastyrý baǵytynda aýqymdy jumystar atqaryla bastaǵanyn jetkizdi. Onyń sózine qaraǵanda, Ýkraınanyń Ulttyq kúnin ótkizý 15 maýsymǵa josparlanyp otyr eken. Al bul kúnniń ashylýyna Ýkraınanyń Premer-mınıstri V.Groısman bastaǵan delegasııasy arnaıy kelmek.
Sonymen qatar, ol Ýkraınanyń ulttyq pavılonynyń aýmaǵy shaǵyn bolǵandyqtan, onda negizinen medıa tanystyrylym ótetinine toqtaldy. «Biz kórmege qandaı da bir qurylǵylardy, ıa bolmasa tetikterdi ákelmeımiz. Al medıa tanystyrylym sheńberinde kórmege qatysýǵa kelgen Ýkraınanyń memlekettik jáne jekemenshik kompanııalarynyń ókilderi elimizdiń múmkindigin, onyń ishinde jańartylǵan energııa kózderine qatysty qol jetkizgen jetistikterimizdi barynsha kórsetýge kúsh salatyn bolady. Aldyn ala aıtatyn bolsam, aýqymdy sharaǵa ondaǵan kompanııa qatysýǵa ynta-nıet tanytyp otyr», – dedi Ýkraına isteri jónindegi ýaqytsha senim bildirilgen ókil.
Sonymen, EKSPO-2017 kórmesine qatysatyn kompanııalar ishinde «DTEK», «Fýrlender Vındtehnolodjı», «SYNEKO», «SolarGaps» sekildi Ýkraınanyń jetekshi ári jekemenshik kompanııalary bar.
Láıla EDILQYZY, «Egemen Qazaqstan»