«Qazirgi ýaqytta oblystyq Ishki ister departamentiniń tergeý basqarmasy О́skemen qalasynyń eki turǵynynyń ólimine baılanysty sotqa deıingi tergeý jumystaryn júrgizip jatyr. Aldyn ala jasalǵan boljam boıynsha qazaǵa ushyraǵan jigit pen Astana turǵyny arasynda burynyraqta ózara kelispeýshilik bolǵan. 30 naýryzdan 31-ine qaraǵan túni astanalyq kegin almaq bolyp, kóligine óziniń kóńilin qaldyrǵan jigit pen onyń dosyn otyrǵyzyp alyp, Sheshek asýyna keledi. Osy jerde kıkiljiń týyndap, sońynda astanalyq qarý qoldanyp, О́skemenniń eki turǵynyn atyp tastaǵan. Qazirgi ýaqytta erekshe aýyr qylmys jasaǵany úshin Astana qalasynyń turǵyny qamaýǵa alyndy», - dedi Nurlan Bıjanov.
Oblys prokýrorynyń orynbasary tergeý barysynda oqıǵa ornynda ShQO ishki ister departamentiniń uıymdasqan qylmysqa qarsy kúres basqarmasynyń qyzmetkeriniń de bolǵany anyqtalǵanyn, qazirgi ýaqytta onyń qamaýǵa alynyp, jumystan bosatylǵanyn jáne qandy oqıǵany jasyrdy degen aıyppen О́skemen qalasynyń eki turǵynynyń qamaýǵa alynyp, qylmysqa qatystarynyń bar-joqtyǵy anyqtalyp jatqanyn málimdedi.
Sonymen qatar, Nurlan Bıjanov kúdikti ózi atyp óltirgen adamdarynyń denesin kóligine salyp alyp, Astanaǵa bara jatqan jolda tastap ketkenin moıyndaǵanymen, qos jigittiń máıiti áli tabylmaǵanyn, tergeý toby izdestirip jatqanyn aıtty. Qylmystyq oqıǵanyń ShQO ishki ister departamenti men oblys prokýratýrasynyń qatań baqylaýyna alynǵanyn, osy iske oraı vedomstvoaralyq komıssııa qurylǵanyn jetkizdi.
Oblys prokýrorynyń orynbasary Qatonqaraǵaı aýdanynyń Úlken Naryn aýylynda oryn alǵan qylmystyq oqıǵaǵa baılanysty da túsinikteme berdi. Esterińizge sala keteıik, 2 sáýir kúni Úlken Naryn aýylynda kúndizgi ýaqytta osy aýyldyń 1985 jyly týǵan turǵynyna 1990, 1980, 1977 jyly dúnıege kelgen úsh jergilikti turǵyn qarýly shabýyl jasaǵan bolatyn. Aýyldaǵy dúkenderdiń biriniń janynda soqqyǵa jyǵylǵan jigit aýdandyq ishki ister bóliminde jumys isteıtin aǵasyn kómekke shaqyrady. Polıseılezde oqıǵa ornyna óz kóligimen jetip, baýyrymen birge úsh jigitti izdep, kólik jóndeý oryndarynyń birinen tabady. Sol jerde taǵy da kıkiljiń bastalyp, úsh jigittiń bireýi polıseıdiń baýyryn atyp, jaralaıdy. Osy kezde ishki ister bóliminiń qyzmetkeri 1980 jyly týǵan jigitke qarsy oq atady. Aýyr jaralanǵan jigit emhanada kóz jumady. 1977 jyly týǵan turǵyn oqıǵa ornynan qashyp ketkenimen, sońynan qolǵa túsedi.
«Osy fakt boıynsha QR QK-niń 293 baby, 3 bóligi «Buzaqylyq», al, polısııa qyzmetkerine qatysty QR QK-niń 102 baby «Qajetti qorǵanys sheginen shyǵý kezinde jasalǵan kisi óltirý» boıynsha sotqa deıingi tergeý bastaldy. Keıinnen AIIB qyzmetkeriniń áreketteri kisi óltirý, ıaǵnı, QR QK-niń 99 babyna sáıkes qaıta saralandy. Ol ustalyp, oǵan qatysty «qamaýǵa alý» túrinde bultartpaý sharasy qoldanyldy», - dedi Nurlan Bıjanov.
Azamat QASYM, «Egemen Qazaqstan» О́SKEMEN