Halyqaralyq kelisimge sáıkes, Ishki áskerdiń, ıaǵnı Ulttyq ulannyń áskerı qyzmetshileri 1993 jyldyń maýsymynan 1999 jyldyń tamyzyna deıin tájik-aýǵan shekarasyn kúzetýge qatysty. Osy jyldary kezekti aýysym túri boıynsha 20 qurama rota qurylyp, 2 myńnan astam sarbaz ben sardar jaýyngerlik tapsyrmany oryndady.
Pamır taýyndaǵy Pshıhavr shatqalynda 1995 jyldyń 7 sáýirinde bolǵan qarýly qaqtyǵys kezinde Ishki áskerdiń 17 jaýyngeri erlikpen qaza taýyp, 33-i jaralanǵan edi. Qaza bolǵan sarbazdardyń esimderine kóshe, mektep ataýlary jer-jerlerde berildi. Áskerı bólimshelerde eskertkishter ashyldy. Máselen, Estelik alleıasy Ulttyq ulan bas qolbasshysynyń bastamasymen jáne Astana qalasy ákiminiń qoldaýymen 2009 jyly sáýir aıynda ashylǵan. Al 2014 jyly osy jerde eskertkish ornatyldy. Endi mine, dál osy eskertkishke Ulttyq ulan bas qolbasshylyǵynyń generaldary men ardagerleri, jeke quramy, Parlament jáne Astana qalasy máslıhatynyń depýtattary, Astana qalasy ákimdigi basshylyǵy, UQK Shekara qyzmetiniń ókilderi, qaza bolǵan jaýyngerlerdiń týystary, ınternasıonalıst-ardagerler kelip, esil erlerdi esterine aldy.
Ulttyq ulan bas qolbasshysynyń orynbasary, general-maıor Albert Matkarımov shara barysynda qaza bolǵan jaýyngerlerdiń eren erlikteri týraly sóz etti.
– Qyrshynynan qıylǵan 17 taǵdyrdy qaıtara almaımyz. Biraq olardyń erligin ár kezde eske saqtaýymyz kerek. Olar – Otan úshin óz ómirin qıǵan erjúrek erler. Qyzmet barysynda qaza bolǵan áskerılerdiń otbasylaryna kómek kórsetý Ishki ister mınıstriniń bastamasymen qolǵa alyndy. Qaza bolǵan 17 jaýyngerimizdiń de otbasylaryna únemi kómek kórsetiletin bolady, – dedi ol.
Sondaı-aq, jıynda qaza bolǵan jaýyngerlerdiń jaqyndary men qarýlastary marqumdar týraly estelikter aıtty. Sodan keıin, jınalǵan qonaqtar qaza tapqan jaýyngerlerdi bir mınýt únsizdikpen eske aldy. Sharanyń resmı bólimi bitken soń, jurtshylyq Estelik alleıasynda 17 jaýyngerge arnalǵan eskertkishke gúl shoqtaryn qoıdy.