Sheteldik qonaqtar kóp keletin bul dúnıejúzilik mańyzy bar sharada qyzmet kórsetý úshin barýdyń basty sharty – aǵylshyn tilin bilýi kerek. Sondyqtan polıseılerge oblystyq til úıretý ortalyǵynda aǵylshyn tiliniń mamany Nazerke Turǵynǵojına tórt aı boıy sabaq berdi. Polıseıler tildi tez meńgerýi úshin jańa ádistemelerdi, ishki ister organdary jumysyna qatysty kúndelikti sózderdi meńgerý ádisin qoldana otyryp, jaqsy nátıjege qol jetkizdi. − Tyńdaýshylar qysqa kýrsty oqyǵanyna qaramastan tildi ájeptáýir meńgerdi, ózderiniń bazalyq bilimi de kómektesti, − deıdi Nazerke Iskanderbekqyzy. Halyqaralyq kórme jumysyna tek volonterler ǵana emes, polısııa qyzmetkerleri de tartylatyny belgili. Jumys barysynda olarǵa sheteldik týrıstermen, qonaqtarmen aǵylshyn tilinde tildesýge týra keledi. Oblystyq ishki ister departamentindegi Arnaıy jedel áreket etý otrıadynyń qyzmetkeri Ińkár О́tetileýov qazaq, orys, aǵylshyn tilderinde erkin sóıleıdi. − Meniń til úırenýge qabiletim joǵary bolsa kerek. Aǵylshyn tili kýrsyna óz ynta-yqylasymmen bardym. Qazir aǵylshyn tilin erkin túsinemin, qınalmaı jaýap qaıtara alamyn, − deıdi Ińkár. Ol aǵylshyn tilinen testi de jaqsy tapsyrdy. Sonymen qatar jol-patrýldik polısııa batalonynyń qyzmetkerleri de aǵylshyn tilinen úzdik nátıje kórsetti. − EKSPO-ǵa kelgen shet eldik qonaqtar Astananyń kórkine tamsanyp qana qoımaıdy, bizdiń polıseılerdiń deńgeıine de rızashylyqpen tańqalady dep oılaımyn, − deıdi jol-patrýldik polısııa batalonynyń komandıri Vıtalıı Soı. Oblystyq til úırený orta-lyǵynyń dırektory Gúlnar Talapovanyń aıtýynsha, polıseıler aǵylshyn tilinde ózin tanystyrýǵa, sheteldik qonaqtar suraǵyna jaýap berýge jáne qalada adasyp qalǵandar kezdesse jol silteýge daıyn bolýy kerek. Olar til úırený barysynda osy mindetterge jaýap beretindeı sózdik qoryn meńgerdi. Aǵylshyn tiliniń oqytýshysy polıseılerge sertıfıkattarmen birge aǵylshyn tilinde qajet bolýy múmkin sózderden turatyn qalta sózdigin de daıyndap, tabys etti. Aıta keteıik, oblystyq ishki ister departamentinen 60 tyńdaýshy jyl saıyn Til úıretý ortalyǵynda qazaq tilin, 30 tyńdaýshy aǵylshyn tilin úırenýge qatysady.
Názıra JÁRIMBETOVA, «Egemen Qazaqstan»
QOSTANAI