Qurǵaq esep

Bul kúnderi elimizde shildeniń aptap ystyǵy bastalǵan kezde Argentınada bizdiń qońyr kúzge uqsas qys mezgilinde jylyna bir keletin Táýelsizdik kúni, jyldar boıy qur­lyqty aralap, árbir elge soǵa­tyn fýt­boldan Amerıka kýbogy jolyn­da­ǵy jarystar ótýde. Osyndaı oqı­ǵalardyń ishinde 7 shilde kúni Býenos-Aıreste jergilikti jan­kú­ıer­ler úshin mańyzy jaǵynan kem tús­peıtin tennısten Devıs kýbogy­nyń shırek fınaly bastalyp, Argentına táýelsiz memleket bolyp jarııa­lan­ǵan 9 shilde kúni aıaqtaldy. Osy kúni tennısten Argentına quramasy Devıs kýbogynyń shırek fınalynda Qazaqstan komandasyn jeńip, jartylaı fınalǵa joldama aldy. Bul básekede Hýan Martın del Potro, Hýan Ignasıo Chela, Edýardo Shvank pen Hýan Monako óz eline birinshi kúngi jeńisten keıin qalǵan eki kúndegi juptyq jáne jekelegen kezdesýde Qazaqstan koman­dasyn taǵy da oısyrata jeńdi. Jarystyń ekinshi kúni Iýrıı Shýkın men Evgenıı Korolev jup­tyq oıynda Edýardo Shvank pen Hýan Ignasıo Chelamen kezdesken edi. Birinshi set 6:3, ekinshisi – 6:2, úshin­shisi – 7:5 bolyp aıaqtalǵan oıynda Argentına oıynshylary otandas­ta­ry­­myzdyń aldyn orap, bir upaı alý­dyń ózine eshqandaı múmkindik bermedi. Osy eki kúnde bizge jerebe joldas bolmaǵanyn aıtý kerek. Birinshi kúni Mıhaıl Kýkýshkın del Potromen emes, máselen, Andreı Golýbev oınaǵan Hýan Monakomen kortqa shyqqanda ony jeńip, komandaǵa bir upaı ákeletini edi dep oılaımyz. О́ıtkeni, Kýkýshkın qazir Golýbev sııaqty babynda bolmaı júrgen joq. Onyń ústine tennısshiniń jarysta motıvasııasy, jeńiske degen jigerligi kózge uryp turdy. Jarystyń úshinshi kúni koman­da­myzdyń eki upaı alamyz degen úmiti bolǵany jasyryn emes. Evgenıı Korolev pen Mıhaıl Kýkýshkın Hýan Ignasıo Chela men Hýan Monakony utsa, qorjynymyz eki upaı­ǵa tolyp, elge bos qaıtpas edik. Alaıda, bizdiń tennısshilerde jeńiske degen umty­lys bol­ǵanymen syrt alańda álemniń búgingi azýly sportshylaryn jeńip júrgen argentınalyqtar óz alańynda bizdi aıasyn ba. Olar Qazaqstan qura­masyn eki oıynda da taza utty. Osy kúni Korolev Chelany birinshi sette 6:2 esebimen jeńse de, odan keıingi setterde 6:2, 6:0 esebimen jeńilip qaldy. Sol sııaqty Kýkýshkın de Monakodan 6:4, 6:1 esebimen utyldy. Sóıtip, úsh kúnge sozylǵan jarystyń qorytyn­dy­sy 5:0 bolyp Argentınanyń paıda­syna sheshildi. Osy jarysty «Park Roke» stadıonynyń kortyna jınal­ǵan 11 000 adam tamashalady. Sonyń ishinde Qazaqstan Tennıs federasııa­synyń prezıdenti Bolat О́temuratov, vıse-prezıdenti Ádil Bórlibaev, «KAR-Tel» kompanııasynyń pıar-menedjeri Anar Jumaǵulova bastap Astana men Almatydan kelgen bir top jankúıerlerdiń komandaǵa belsendi qoldaý kórsetkenin atap ótken jón. Devıs kýbogynyń shırek fınaly sııaqty osyndaı jaýapty synda elimiz quramasyna qoldaý kórsetý úshin jankúıerlerdi Argentınaǵa aparǵan Qazaqstan Tennıs federasııasy men «Beeline» kompanııasyna alǵystan basqa aıtarymyz joq. Al jartylaı fınalǵa joldama alǵan Argentına quramasy endi Shvesııa men Serbııa komanda­lary­nyń ara­synda ótip jatqan oıynnyń je­ńim­pazymen kezdesedi. Dastan KENJALIN, Býenos-Aıresten.