Keshe Qazaq ulttyq qyzdar pedagogıkalyq ýnıversıtetinde KazChessLab ınnovasııalyq zerthanasynyń ashylý saltanaty ótti. Zerthana Ǵylym jáne joǵary bilim mınıstrligi qoldaýymen QyzPU men Qazaqstan shahmat federasııasy arasyndaǵy seriktestik aıasynda júzege asyryldy, dep habarlaıdy Egemen.kz.
Is-sharaǵa Ǵylym jáne joǵary bilim mınıstri Saıasat Nurbek, Qazaqstan shahmat federasııasynyń prezıdenti Tımýr Týrlov, Qazaqstan shahmat federasııasynyń vıse-prezıdenti Dármen Sádýaqasov jáne Qazaq ulttyq qyzdar pedagogıkalyq ýnıversıtetiniń basqarma tóraǵasy – rektory Beıbitkúl Kárimova qatysty.
KazChessLab – bolashaq muǵalimderdi jalpy bilim beretin mektepterde shahmat pánin oqytýǵa daıarlaýǵa baǵyttalǵan zamanaýı bilim berý alańy. Zerthana shahmattyq bilim berý ádistemesin damytý ortalyǵyna aınalyp, stýdentterdiń praktıkalyq oqytý daǵdylaryn qalyptastyrýǵa múmkindik beredi. Ortalyqta sheberlik sabaqtary, ǵylymı semınarlar, stýdentterdiń praktıkalyq sabaqtary ótkiziledi.
Bıbisara Asaýbaeva shahmattan álem chempıonyn jeńdi
Ashylý saltanatynda Ǵylym jáne joǵary bilim mınıstri Saıasat Nurbek sóz sóılep, shahmatty strategııalyq turǵyda damytý qadamdaryna toqtaldy.
«2023 jyly Memleket basshysy Qasym-Jomart Toqaevtyń tapsyrmasymen shahmat oıynyn strategııalyq turǵyda damytý týraly jospary bekitildi. Ár bala mektep kezinen shahmatpen tanys bolyp, jetik meńgerýi tıis. Qazirgi tańda elimizde shahmat boıynsha aıtarlyqtaı bıik jetistikterimiz bar. Osy jetistikterimizdi ary qaraı damytý úshin eń aldymen ustazdar qajet», dedi mınıstr.
Baǵdarlama pedagogıkalyq mamandyqtar stýdentterine arnalyp, minor formatynda júzege asyrylady. Kýrsty támamdaǵan bolashaq muǵalimder mektepte shahmat pánin oqytý quqyǵyn rastaıtyn sertıfıkat alady. Is-shara aıasynda osy baǵyt boıynsha daıarlyqtan ótken alǵashqy 25 jas mamanǵa sertıfıkattar tabystaldy.
О́tken jyly eń kóp tabys tapqan shahmatshylar belgili boldy
Basqarma tóraǵasy – rektor Beıbitkúl Kárimova shahmatty oqytýdyń mańyzdylyǵyna erekshe toqtalyp, stýdentter men oqytýshylarǵa sáttilik tiledi.
«Ýnıversıtetimizde KazChessLab ınnovasııalyq zerthanasynyń ashylýy – bilim berý mazmunyn jańǵyrtýǵa, bolashaq pedagogterdiń kásibı áleýetin arttyrýǵa baǵyttalǵan mańyzdy qadam. Shahmat – jaı ǵana oıyn emes. Ol – strategııalyq oılaý mádenıeti, jaýapkershilik pen tabandylyq mektebi. Osy pándi kásibı deńgeıde oqyta alatyn muǵalimderdi daıarlaý – búgingi kúnniń ózekti mindeti», dedi rektor.
Qazaqstan shahmat federasııasynyń prezıdenti Tımýr Týrlov kópjyldyq jumystyń qorytyndysyn jasap, laboratorııanyń ashylýyn tarıhı kezeń retinde baǵalady.
«Qazaqstanda shahmat birneshe jyl boıy osy maqsatqa jetýge umtyldy. Bul jas mamandar balalarǵa tek oıyn erejelerin úıretip qana qoımaı, olardyń ıntellektýaldy damýyna jol kórsetetin ustazǵa aınalady. Zamanaýı ınfraqurylym, myqty pedagogıkalyq mektep jáne memlekettik qoldaýdyń sınergııasy Qazaqstandaǵy shahmatty jáne shahmattyq bilimdi jańa deńgeıge kóteretinine senimdimin», dedi ol.
Shahmattan el chempıonaty bastaldy