Zerthanany tanystyrý sharasyna «Qazposhta» AQ Innovasııalar jáne aqparattyq tehnologııalar jónindegi dırektory Narıman Muqyshev, Derekterdi basqarý departamentiniń dırektory Baqtııar Muhametqalıev, Súleımen Demırel ýnıversıtetiniń oqý isi jónindegi birinshi prorektory Saltanat Ámirǵalıeva, kompıýterlik ǵylymdar kafedrasynyń meńgerýshisi Mádına Álımanova, joǵary oqý ornynan keıingi bilim berý departamentiniń dırektory Maqsat Musabekov, korporatıvtik damý menedjeri Mahmut Tomanov qatysty.
«3D-baspa – qazirgi kezde medısına, qurylys, jobalaý jáne basqa da salalarda qarqyndy damyp kele jatqan revolıýsııalyq tehnologııa ekeni sózsiz. Qazaqstanda da osy tehnologııany damytýdyń mańyzdylyǵyn túsine otyryp, biz búgin Qazposhtada 3D-baspa zerthanasyn ashtyq. Bizdiń basty maqsatymyz – 3D-baspamen neǵurlym kóp adamdardy tanystyryp, olardyń kez kelgen shyǵarmashylyq ıdeıalaryn iske asyrýǵa kómektesý. Bul zerthana ekonomıkanyń osy baǵytyn damytý jolyndaǵy úlken qadam bolady dep oılaımyn», dedi Narıman Muqyshev.
Súleımen Demırel ýnıversıtetiniń Aǵataev Asyljan, Toqmanov Baýyrjan syndy ónertapqysh stýdentteri jasaǵan 3D prınterdi jalǵa alý arqyly atalmysh zerthana jumysyna stýdentterdi jumyldyra otyryp, olarǵa tehnıkalyq qoldaý kórsetýdi, shyǵys materıaldarymen qamsyzdandyrýdy moınyna alǵan «Qazposhta» endi 3D ónimderine tapsyrys ala bastamaq. Al ýnıversıt stýdentteri óz kezeginde, 3D-zerthana bazasynda jańa tehnologııalardy synaqtan ótkizip, óz jobalaryn aqshaǵa aınaldyrý múmkindigine ıe bolmaq.
Vırtýaldy 3D-úlgilerdiń negizinde kólemdi zattardy basyp shyǵaratyn 3D-prınter jaı qaǵaz paraǵyn basyp shyǵaratyn kádimgi prınterge qaraǵanda úsh ólshemdi aqparatty kózben kórip, qolmen ustaýǵa, naqty bir fızıkalyq pishinderdi, buıymdardy jasap shyǵarýǵa múmkindik beredi.
«Qazposhtanyń» Almaty ortalyǵynda ashylǵan bul 3D-zerthanasy qazaq tilinde Braıl qarpimen kitaptar shyǵarý, kádesyılar, kilt ilmekteri, oıynshyqtar, kózildirik jıektemeleri jáne ózge de buıymdardy, tutynýshylar tapsyrys bergen 3D-úlgilerdi basyp shyǵarýdy negizgi baǵyttar etip almaq.
Zerthana qyzmetterin kez kelgen azamat qoldana alatynyn aıtqan poshta qyzmetkerleri tek aldymen postmarket.kz saıtyna kirip, qajetti modeldiń úlgisin tańdap, basyp shyǵarýǵa tapsyrys jiberý jetkilikti deıdi. Basyp shyǵarylǵan úlgini Qazposhta qyzmetkerleri ótinimde kórsetilgen meken-jaı boıynsha jóneltpek.
«Saıtta kórsetilgen úlgilerden ózge, 3D-úlginiń nusqasyn nemese jaı ǵana sýretti jiberýge bolady. Olardyń negizinde stýdentter úsh ólshemdi úlgi jasap, tapsyrysty oryndaıdy. 3D-úlgilerdiń quny klıentter tapsyrys bergen kezde esepteledi», deıdi Saltanat Ámirǵalıeva.
«Qazposhta» AQ aldaǵy ýaqytta Astana qalasynda da 3D zerthanasyn ashýdy qolǵa almaq.
Mıra BAIBEK,
«Egemen Qazaqstan»