Kásipqoı PR-shylardyń esinde bolsa, bul forým tuńǵysh ret 2004 jyly uıymdastyrylǵanda, bar bolǵany 70 shaqty adam jınalǵan edi. Búginde PR-forým elimizdegi pıarshylardyń eń kásipqoı kommýnıkasııalyq alańy bolyp tabylady.
Endigi tańda dástúrli forýmǵa qatysýǵa múddelilik tanytatyn PR-menedjerler, óz isin alǵa jylǵysy keletin kompanııalar az emes. Al forýmnyń aıtýly qonaǵy, ICCO prezıdenti Maksım Behar PR, ıaǵnı kommýnıkasııanyń álemdegi eń ǵajaıyp, qubylyp turatyn bıznes ekendigin aıtady.
Bıylǵy forýmǵa 250-ge jýyq PR-salasynyń otandyq jáne sheteldik jetekshi mamandary, memlekettik jáne bıznes-qurylymdardyń top-menedjerleri, marketologtar, jýrnalıster qatysýda. Jáne kópshilik ádettegi jıyndardaı forýmdy jartysynan tastap ketken joq.
Kúnniń alǵashqy jartysynda byltyrǵy forým men bıylǵy forým aralyǵyndaǵy oraıy kelmegen PR-jobalar, mass-medıada oqshaý qylyqtarymen kóringen tulǵalar, halyq tarapynan túsinistik tappaǵan memlekettik bastamalar týraly sóz boldy. Mamandardyń aıtýynsha, sátsizdikke ushyraǵan iri jobalardyń astarynda kóp jaǵdaıda durys jáne tıimdi kommýnıkasııa qura bilmeý jatyr. Jáne bul jaǵdaılardyń ekonomıkaǵa da, saıasatqa da qatysy bar. Áıtpese sózinen jańylypy júrgen mınıstrler, oǵash sóılep qoıatyn sheneýnikter shyn máninde sonshalyqty aqymaq emes.
Qazaqstan baspasóz klibynyń dırektorynyń orynbasary Sáken Balbaev pen informburo.kz bas redaktory Mıhaıl Dorofeev moderatorlyq etken PR-forýmnyń alǵashqy jartysynda 2016 jyly sátsizdikke ushyraǵan PR-jobalardyń reıtıngi jasaldy. Negizgi plenarlyq otyrysta V2S Basqarýshy seriktesi Aleksandr Danılov top bastaǵan TOP-10 kórsetkishin jasap, aqparat aıdyny men áleýmettik jelilerde jurtqa kelemej bolǵan keleńsiz oqıǵalar reıtıngi sóz boldy. Jáne mundaı jaǵdaılardyń nege oryn alyp jatqany qyzý talqylanyp, spıkerler tarapynan oǵan ádil baǵa berildi.
Spıkerler Dosym Sátpaev, Ásel Qaraýylov, Rahym Oshaqbaevtar, Aıdos Sarym, Álisher Elikbaev qazirgi mass-medıadaǵy eń kókeıkesti máselelerge qatysty kózqarastarymen bólisti.
Ekinshi plenarlyq otyrys PR salasyndaǵy halyqaralyq jáne jergilikti trendterge arnaldy. Elge ınvestısııa tartý, jarnama men PR-dyń arajigi, ekonomıkanyń barlyq salasyndaǵy kompanııalardyń qyzmeti men bedeline qatysty marketıngtik zertteýler foýrmǵa qatysýshylardyń nazaryna usynyldy.
Aınash ESALI,
«Egemen Qazaqstan».
ALMATY