Kórmeniń ashylý saltanatynda sóz alǵan Memlekettik hatshy G.Ábdiqalyqova Elbasy Nursultan Nazarbaev pen Saýd Arabııasynyń koroli Salman ıbn Abdýl-Ázız ál-Saýdtyń arasynda qalyptasqan shynaıy dostyq pen syılastyq qarym-qatynastyń arqasynda búginde eki el halyqtarynyń barys-kelisi men jan-jaqty baılanystarynyń arta túsip otyrǵanyn atap kórsetti. «Búgin elordamyzdyń tórindegi Ulttyq mýzeıde Saýd Arabııasynyń asa kórnekti basshysy bolǵan uly mártebeli korol Feısal ıbn Abdýl-Ázız ál-Saýdtyń tutynǵan jeke zattary men kezinde onyń bastamasymen óndirilgen ónimder kórmesiniń ashylý saltanatyn ótkizip otyrmyz. Eksponattar qatarynda uly mártebeliniń túrli qarý-jaraqtary men nagradalary, arhıvtik qujattary men fotosýretteri bar. Ár memlekettiń tarıhynda sol eldiń saıası-ekonomıkalyq jáne rýhanı aıryqsha iz qaldyrǵan úlken tulǵalary bolady. Dostas Saýd Arabııasyna 1964-1975 jyldar aralyǵynda kemel basshylyq jasaǵan, birqatar saıası jáne ekonomıkalyq reformalardy tabysty júzege asyryp, eldiń áleýetin arttyrýda úlken is tyndyrǵan uly mártebeli korol Feısal ıbn Abdýl-Ázız ál-Saýdty biz sondaı tulǵa retinde tanımyz. Biz korol Feısal júrgizgen aýqymdy reformalar qoǵamdy jan-jaqty damytyp, sapalyq jańa deńgeıge kótergendiginen habardarmyz. Uly mártebeliniń bastamashyldyǵymen kóptegen zań qabyldanyp, josparlaý júıesi engizilgen. Olar Saýd Arabııasynyń halqyna kúni búginge deıin qyzmet etip keledi»,– dedi G.Ábdyqalyqova. Memlekettik hatshy, sondaı-aq, korol Feısaldyń kúsh-jigeriniń arqasynda Saýd Arabııasy álemdik jetekshi derjavalardyń qataryna qosylǵanyn úlken qurmetpen atady. Osyndaı daryndy basshy, dara tulǵanyń eli úshin tyndyrǵan árbir isi halyqaralyq deńgeıde tereń tanyp, bilýge, zerttep zerdeleýge laıyq ekenine nazar aýdardy. «Al ol tutynǵan jádiger buıymdardyń kózge ystyq, kóńilge jaqyn bolýy zańdy. Munyń ózi qazaqstandyqtardyń arab halqynyń mádenıeti men qolóner týyndylarynan kóbirek habardar bolýyna septigin tıgizetindigi sózsiz. Elimizde EKSPO-2017 halyqaralyq kórmesi ashylar qarsańda Astanada korol Feısal tutynǵan buıymdar kórmesiniń jumys isteı bastaýy elimizdiń mádenı ómirindegi eleýli oqıǵalardyń biri bolyp tabylady. Sondaı-aq, bul kórme elorda turǵyndary men qala qonaqtarynyń tarapynan úlken qyzyǵýshylyq týdyrady degen úmittemiz. Mundaı sharalar dinimiz bir, dilimiz jaqyn, osyǵan baılanysty tilimizde de ortaq sózder jıi ushyrasatyn Saýd Arabııasy Koroldigi men Qazaqstan halyqtary arasyndaǵy ózara dostyq pen yntymaqtastyq baılanystardyń odan ári nyǵaıa túsýine yqpal etedi dep oılaımyn», – dedi Memlekettik hatshy. Aı sońyna deıin jalǵasyn tabatyn kórme ekspozısııasy Saýdııa qoǵamynyń barlyq salasyna yqpal etken aýqymdy reformalardy bastap bergen korol Feısal basqarǵan (1964-1975 jj.) Saýd Arabııasynyń ótken kezeńine arnalady. Sondyqtan da Memlekettik hatshydan keıin sóz alǵan korol Feısal atyndaǵy Islamdy zertteý ortalyǵynyń basqarma tóraǵasy, hanzada Túrkı ál-Feısal ál-Saýd mundaı kórme TMD boıynsha alǵash ret uıymdastyrylyp otyrǵanyn atap ótti. «Osyndaı ǵajap ǵımarattaǵy keremet kórmeniń ashylý saltanatyna qatysyp otyrǵanyma óte qýanyshtymyn. Sonymen qatar, korol Feısalǵa arnalǵan kórme zalynyń shet elde eń alǵash ret ashylyp otyrǵanyn da atap ótkim keledi. Osyǵan qarap, eki el halqyn tek saýda, dıplomatııalyq qatynastar ǵana baılanystyrmaıtynyn baıqaýǵa bolady. Halyqtar arasynda dinı nanym-senim túsinigi ǵana emes, mádenı, rýhanı baılanystar da ózara úndesip jatqandyǵy aıqyn ańǵarylady», – dedi ol. Aıta keteıik, kórmeniń resmı ashylý saltanatyna Prezıdent Keńsesiniń bastyǵy M.Qasymbekov pen Mádenıet jáne sport mınıstri A.Muhamedıuly, Saýd Arabııasy koroliniń keńesshisi, Feısal ortalyǵynyń aýqymdy delegasııasy, Saýd Arabııasynyń Qazaqstandaǵy Koroldigi elshiliginiń ókilderi qatysty. Sonymen qatar, shara aıasynda qazaq jáne orys tilderinde jaryq kórgen «Ál-Feısal: Ádildik jáne batyldyq joly» atty kitap oqyrman qaýym nazaryna usynyldy.
Nurlybek DOSYBAI, «Egemen Qazaqstan»