Sonymen EKSPO-2017 halyqaralyq mamandandyrylǵan kórmesi aıasynda uıymdastyrylatyn Dıý Soleı sırkiniń qoıylymyna bıletter 2017 jylǵy 10 mamyrdan bastap satylymǵa tústi.
Shtab-páteri Monreal qalasynda ornalasqan Dıý Soleı sırki qazirgi tańda oıyn-saýyq ındýstrııasyndaǵy alyp kompanııalardyń birine aınalǵan. Sırk ujymynda álemniń 50 elinen jınalǵan 4000 jýyq adam eńbek etedi, onyń 1300-i − ártister. Álemge áıgili Dıý Soleı sırki osy ýaqytqa deıin álemniń 400-den astam shaharynda óner kórsetip úlgerdi. Endi olar EKSPO-2017 aıasynda alǵash ret Astanaǵa at basyn tiremek.
Qazaqstannyń baı mádenıeti men tarıhynan jáne «Bolashaq energııasy» atty kórme taqyrybynan shabyttanǵan sırk ártisteri Astana turǵyndary men qonaqtary úshin arnaıy eksklıýzıvti «REFLEKT» shoý-baǵdarlamasyn daıyndady. Tańǵajaıyp qoıylymda qazaq halqynyń baı mádenı murasy men adamzattyń bolashaqqa degen asyl armandary ózara órilip jatady. Jalpy, sırk tarapynan 2017 jyldyń 10 maýsymynan 10 qyrkúıegine deıin 71 qoıylym josparlanyp otyr. Sırk qonaqtary biregeı shoýdy arnaıy jabdyqtalǵan úshburysh tárizdes pavılonda tamashalaı alady. Onyń syıymdylyǵy 2000 kórermenge arnalǵan. Qoıylym tusaýkeseri kórme alańynda 16 maýsym kúni ótedi.
Dıý Soleı sırkiniń tańdaı qaqtyrarlyq qoıylymynyń kýágeri bolý úshin EKSPO-2017 kórme qalashyǵyna kelińiz. Sırk qoıylymdarynyń bılet quny 4000 teńgeden bastalady.
Jylqybaı JAǴYPARULY, «Egemen Qazaqstan»