Elbasy Joldaýyn nasıhattaý jáne halyqqa túsindirý maqsatynda Májilis depýtaty Saýytbek Abdrahmanov óńirlerdegi kezdesýleri aıasynda Baızaq aýdanynda boldy.
Depýtat aýdan ortalyǵy – Sarykemer aýylyndaǵy «Qazaqstannyń 40 jyldyǵy» atyndaǵy orta mektepte óńir turǵyndarymen kezdesip, Elbasy Joldaýy tóńiregindegi oılarymen bólisti. Aýyl turǵyndarymen kezdesý barysynda áńgime negizinen eki arnada órbidi. Onyń birinshisi – bılik tarmaqtary arasynda ókilettikterdi qaıta bólý jónindegi Elbasy Úndeýi, ekinshisi Prezıdenttiń Qazaqstan halqyna Joldaýy boldy.
Depýtat Elbasy sheshimimen halyq talqylaýyna salynyp otyrǵan ózgerister týraly tolyq áńgimelep, olar elimizdiń memlekettik bıligin demokratııalandyra túsý isindegi asa mańyzdy qadam bolyp tabylatynyn túsinikti tilmen jetkizdi. Sondaı-aq, halyq qalaýlysy Qazaqstannyń Úshinshi jańǵyrýyn kózdeıtin Elbasy Joldaýynyń mánin baıandaý barysynda jahandyq básekelestik pen álemdegi turaqsyzdyq jaǵdaıynda týyndaıtyn syn-qaterlerge qarsy turýǵa oraı kózdelgen baǵyttar jóninde de baıan etti. О́z sózinde Saýytbek Abdrahmanuly Qazaqstan búgingi tańda álem taǵdyryna yqpal jasap otyrǵan memleket ekendigin de basa aıtty. Sırııa bıligi men qarýly oppozısııany Astanadaǵy bir ústel basyna toǵystyrǵan Elbasynyń álemdik dárejedegi bedeli ekenin de atap ótti.
Sondaı-aq, depýtat Joldaýda aıtylǵan «Sıfrlyq Qazaqstan», adamı kapıtaldy arttyrý máseleleri boıynsha da áńgime órbitti. Al elimizdegi kún, jel energııalarynyń asa mańyzdylyǵyna da toqtaldy. О́z kezeginde aýdan turǵyndary da Úndeý men Joldaý jaıynda óz oılaryn ortaǵa salyp, Elbasy bastamalaryna qoldaý bildirdi. О́zderin tolǵandyratyn jaılarǵa qatysty depýtatqa qoıǵan suraqtaryna tolymdy jaýaptar aldy.
Mundaı kezdesýler aýdannyń bilim berý salasynyń qyzmetkerlerimen, Myrzataı aýylynyń turǵyndarymen, «Jambylqus» JShS ujymymen, Qyzyl Juldyz aýylynyń turǵyndarymen, «ROLA» JShS ujymymen jáne aýdan kásipkerlerimen de bolyp ótti.
Hamıt ESAMAN, «Egemen Qazaqstan»
Jambyl oblysy