«Baıterek DEVELOPMENT» AQ-da qylmystyq top áshkerelengennen keıin, júıeli sybaılas jemqorlyq táýekelderi anyqtaldy. Bul týraly QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń alqa májilisinde osy vedomstvonyń tóraǵasy Qaırat Qojamjarov málim etti, dep habarlaıdy «QazAqparat».
«Birqatar qylmystyq isterdi tergegennen keıin júıeli táýekelderdiń betin ashamyz. Olar shyn máninde memleketimizdiń tirshiligindegi túrli salalarda sybaılas jemqorlyq shemalaryn týdyrady. Máselen, Ulttyq qor qarjysyn uzaq ýaqyt boıy jymqyryp kelgen qylmystyq top áshkere bolǵannan keıin, barlyǵyn esh qıyndyqsyz urlaý úshin jaǵdaı jasaǵan birqatar qadamdardy anyqtadyq. Iаǵnı bul turǵyda «Báıterek» qoryna qatysty mán-jaıdy aıtyp turmyn», – dedi Qaırat Qojamjarov.
Agenttik basshysy kvazımemlekettik sektorǵa memlekettik satyp alýlar týraly zańnamanyń kúshi taramaıtynyn atap ótti. Al bul sektordaǵy korporatıvti kodeks satyp alýlarda sheshimdi bir adamnyń qabyldaı berýine múmkindik beredi.
Qojamjarovtyń paıymynsha, birinshi kezekte kvazımemlekettik sektorǵa qoǵamdyq qadaǵalaý qajet. Jalpy, sybaılas jemqorlyq kórinisterine tosqaýyl qoıý úshin júıeli sharalar qabyldaý kerek bolyp tur.
Esterińizge sala keteıik, 2016 jyldyń qarashasynan bastap «Baıterek DEVELOPMENT» AQ basshylyǵyna qatysty para alý faktileri boıynsha tergeý amaldary bastaldy.