QR IIM arnaıy qyzmeti Internette ólim toptarynyń bar-joǵyn zerttep jatyr. Bul týraly Ishki ister mınısri Qalmuhanbet Qasymov Parlament Májilisi barysyndaǵy otyrysta aıtty, dep jazady tengrinews.kz.
"Árıne, biz Internetti tolyqtaı baqylap otyrmyz, ólim oıyndaryn anyqtap jatyrmyz. Búginde 100-den asa derek anyqtaldy jáne biz olardy buǵattaý úshin Aqparat jáne kommýnıkasııalar mınıstrligine joldadyq, Byltyr óz-ózine qol jumsamaq bolǵandar jáne óz-ózin óltirý derekterine qatysty 44 qylmystyq is qozǵalǵan. Saldarynan 16 bala qaıtys bolǵan. Sol kezde júrgizilgen tergeýler bul derekterdi anyqtamaǵan", - dedi mınıstr.
"Qazirgi tańda qańtar jáne aqpan aılary boıynsha kámeletke tolmaǵandarǵa qatysty 63 oqıǵa tirkelgen. 15 bala ózderine qoldan keletin barlyq jaraqatty jasaǵan. Bizge balalardyń ata-analarynan, muǵalimderinen, týystarynan hattar kelip jatyr. Barlyq derek boıynsha qajetti sharalardy qoldanyp jatyrmyz. Basty problema - qoldanylyp jatqan resýrstardyń Qazaqstannan tys jerde bolýynda. Mysaly, "VKontakte" áleýmettik jelisi Reseıdiki, Facebook pen Instagram jelileri AQSh-ta. Biz endi zańdy túrde qazaqstandyq qoldanýshylarǵa qatysty barlyq málimettiń bizdiń qolýymyzdan bolýyn mindetteýimiz kerek nemese olardy qazaqstandyq provaıderler arqyly jumys isteýge mindetteýimiz qajet. Árbir derek prokýratýraǵa joldanady, onymen qosa, túrli zańnamalar bar, sizder endi osy jumystyń osylaısha uzaq júrgiziletinin kórip otyrǵan shyǵarsyzdar", - dedi Qalmuhanbet Qasymovú
Sondaı-aq, mınıstr "Sınıı kıt" jáne "Tıhıı dom" degen sýısıdke shaqyratyn pablıkter men paraqshalar jaıly tolyǵyraq aıtyp berdi.
"Sońǵy "Sınıı kıt" jáne "Tıhıı dom" paraqshalaryn tekserdik. Tekserip jatyrmyz, Reseıdiń zor tájirıbesi bar. Olar bul máselemen 2013 jyly aınalysqan edi. Byltyr Reseıde ólim tobyn ashyp, ony F-57. F - Fıllıp dep ataǵan Fılıpp Býdeıkın degen adam ustalǵan, onyń paraqshasynyń sońǵy sıfrlary - 57. Oǵan birneshe jasóspirimniń ólimine qatysy bar degen aıyp taǵylǵan. Árıne, osydan keıin onyń "izbasarlary" jolyn jalǵastyrǵan. Qazir "Pozvonı mne v 4:20", F-58 degen taǵy da kóptep toptar paıda bolǵan. Onyń ústine, olar qazir muny telefondarǵa qosymshalar arqyly jibergen - Whatsapp, Instagram, Facebook. Sondyqtan munda máseleler bar. Eriktiler ǵana emes, biz de baqylap jatyrmyz, arnaıy qyzmetti otyrǵyzyp, osy jumysty baqylatyp jatyrmyz", - dedi Qasymov.
"Olardyń balalardyń psıhıkasyna áser etetini, tartatyny belgili. Osy 63 oqıǵanyń 15-inde balalar ózderi kóńil kótergen. Keıbireýleri paraqshasynyń deńgeıin kótergisi kelgen, al 15 bala ózine jaraqat salǵan", - dep naqtylady mınıstr.
Sonymen qatar, Qasymov reseılik áriptesteriniń qalaı áreket etkeni jaıly aıtty.
"Árıne, psıhıkaǵa áser etedi. Oqyp kórseń, shamamen 50 kún beriledi eken, ár kúni qatysýshy belgili bir tapsyrmalardy oryndaý kerek, máselen 18-shi kúni tańǵy 4:20-da turyp, shatyrǵa shyǵyp, biraz turý kerek. Al 19-shy kúni "eń iri kópirge bar". 21-i kúni "eń bıik kranǵa shyq". Al 28-shi kúni kıtpin dep ant berýiń kerek eken. 39 ben 49-shy tapsyrmalarda túngi 4:20-da kún saıyn oıanyp, úreıli fılmder kór deıdi. 50-shi kúni "óz-ózińe qol sal nemese bıiktikten sekir" dep tapsyrma beredi. Biz de nege 50 kún ekenin suradyq. Reseılikterdiń nusqasy boıynsha, 2013 jyly kitap jazylǵan, avtory Anastasııa Holova. "50 dneı do moego samoýbııstva" dep atalady. Bul solardyń kitaby bolyp, sony paıdalanady. Kitapta aýyr jaǵdaıdy basynan keshiretin áıel jaıly aıtylady: jaýapsyz mahabbat, ata-ananyń ajyrasýy, satqyndyq - al bul jaǵdaıdan shyǵýdyń jalǵyz joly - ózin-ózi óltirý. Krımınaldyq polısııa búkil Internetti baqylaıtyn bolady", - dedi mınıstr.