Aǵymdaǵy jyldyń 20 naýryzy men 8 sáýiri aralyǵynda Aqmola oblysynda áleýmettik-ekologııalyq «Eko Bolashaq» jobasy bastalady. Osyǵan oraı Energetıka mınıstrliginiń qoldaýymen «Agripp Business Group» kompanııasy qazaqstandyq orta bilim beretin mektepterdiń oqýshylary arasynda makýlatýra jınaýdan jalpyrespýblıkalyq aksııa ótkizedi.
Bul aksııa «Eko Bolashaq» áleýmettik-ekologııalyq jobasy sheńberinde júzege asyrylatyn bolady. Joba elimizdiń barlyq mektepterin qamtyǵan 2 mıllıonǵa tarta oqýshyǵa baǵyttalǵan. «Árbir ótkizilgen bir kılo makýlatýradan túsetin bes teńge serebraldy sal aýrýymen aýyratyn balalarǵa kómek kórsetetin «Qasıetti Jol» qaıyrymdylyq qorynyń esep-shotyna aýdarylady. Makýlatýradan túsken tabys bilim mekemeleri úshin sharýashylyq zattaryn, tyńaıtqyshtar men tuqym satyp alýǵa jumsalady», deıdi «Eko Bolashaq» jobasyn damytý jónindegi dırektor Stas Melnıkov.
Onyń paıymdaýynsha, eń basty maqsat – jastardy tárbıeleýdi yntalandyrý, olardy jaýapkershilikke úıretý. «Osy jobanyń kómegimen balalardyń boıynda tabıǵatpen ózara baılanys bar ekendigin, sonyń negizinde óskeleń urpaqtyń ekologııalyq kózqarasy men mádenıetin qalyptastyrý kózdelgen. Bul adamnyń qorshaǵan ortaǵa jáne densaýlyǵyna degen jaýapkershiligin týdyrady», deıdi dırektor.
Jalpy, «Eko Bolashaq» jobasy jyl saıyn dástúrli túrde ótkizilip turmaq. Ony uıymdastyrýshylar aksııanyń jalpy, ulttyq sıpat alyp, el azamattaryn qorshaǵan ortany kútýge jáne balalarynyń ekologııalyq bolashaǵyn qamtamasyz etýge úıretedi degen senimde.
Asqar TURAPBAIULY,
«Egemen Qazaqstan»
Aqmola oblysy