Ortalyq kommýnıkasııalar qyzmetinde qazaq kúresinen ótetin «Eýrazııa barysy» halyqaralyq týrnırine arnalǵan baspasóz máslıhaty boldy. Bul týrnır bıyl tórtinshi ret, 1 jeltoqsan kúni Almaty qalasynda ótedi.
Baspasóz máslıhatyna «Qazaqstan barysy» qazaq kúresin damytý qory qamqorshylar keńesiniń tóraǵasy Arman Shoraev, osy qordyń atqarýshy dırektory, Qazaq kúresi federasııasynyń vıse-prezıdenti Sársen Quranbek pen túıe balýan Beıbit Ystybaev qatysty. Onda A.Shoraev týrnırdiń daıyndyǵy týraly baıandady. Sonymen birge, ol Qazaqstan komandasynyń quramy týrnırge birneshe kún qalǵanda anyqtalatynyn, «Eýrazııa barysy» týrnırine deıin qalǵan on kún ishinde qos quramdaǵy balýandar Almatyda oqý-jattyǵý jıynyn ótkizetinin aıtty. Al S.Quranbektiń aıtýynsha, osy jyly jarysqa qatysýshylar qatarynda aty álemge áıgili balýandar az emes. Grýzııa quramasynyń sapynda sambodan tórt dúrkin álem chempıony Vahtang Chıdrashvılı, eki dúrkin Eýropa chempıony Davıd Larıoshvılı men álem jáne Eýropa chempıonattarynyń júldegerleri bar.
– Bıylǵy synǵa Mońǵolııa komandasynda sambodan álem chempıony A.Baıaraa, dzıýdodan álemdik gran-prı týrnırleriniń birneshe dúrkin júldegeri H.Ganbold keledi. Osy eldiń quramynda 2014 jyly «Eýrazııa barysy» atanǵan sportshylar da bar. Týrnır óte qyzyqty jáne tartysty ótedi dep otyrmyz. О́ıtkeni, basqa elderdiń palýandary da jerge qarap qalmaıtyn sportshylar. Olardyń arasynda ulttyq jekpe-jek túrleri, sonyń ishinde kúres, beldik kúres jáne taǵy basqa da kúres túrlerinen álem chempıony ataǵyn ıelengen balýandar kóp, – dedi ol.
Jıynda A.Shoraev «Eýrazııa barysynyń» júlde qory 20 mıllıon teńge bolatynyn, týrnırdiń jeńimpazyna 10 mıllıon teńge, ekinshi oryn alǵan balýanǵa 6 mıllıon teńge, úshinshi orynǵa ıe bolǵan sportshyǵa 4 mıllıon teńge tapsyrylatynyn aıtty.
Dastan KENJALIN,
«Egemen Qazaqstan»