Qaıyrymdylyq jasaý – bir ǵanıbet

Qaı qoǵamda bolsyn mánin de, ózektiligin de joımaıtyn bir qundylyq bar ekeni ras. Ol – qaıyrymdylyq. Adamdardyń bir-birine qaıyrymdylyǵy nemese jekelegen kompanııalardyń keıbir jandarǵa qolushyn sozyp, jasaıtyn qaıyrymdylyǵy, tipti oǵan qatysy joq adamnyń da kóńiline jylý syılaıdy. Nege deseńiz, ondaı jaǵymdy jańalyqtyń, ıgi istiń jaqsy sharapaty bolady. «Qýanyshty bólisseń kóbeıedi» degendeı, mundaı is adamdardy qashanda qaıyrymdylyq jasaýǵa ıtermelep turady. Osyndaı qaıyrymdy istiń biri jýyrda «Embimunaıgaz» aksıonerlik qoǵamynyń jumyskerleri tarapynan kórsetildi. Olar ózderiniń jeke qarjysyn shyǵaryp, nóser jaýynnyń kesirinen úıin sý basqan atyraýlyq bir otbasyna jańa úı salyp berdi. Osy jyldyń mamyr aıynda Atyraý qalasy jaýyn-shashyndy boldy. Kúndi kúnge, túndi túnge jalǵaǵan qatty jaýynnyń saldarynan Gúlbaǵyt Qyzyltashtyń úıin sý basqan edi. Saldarynan turǵyn úı turýǵa jaramsyz dep tanylyp, qaýipsizdik úshin gaz júıesinen de ajyratylyp tastaldy. Dál osy shaqta shańyraqtyń otaǵasy jol-kólik apatyna ushyrap, Gúlbaǵyttyń ózi tórtinshi balasynyń ómirge kelýine baılanysty dekrettik demalysta úıde otyrǵan-dy. Oǵan qosa otbasyndaǵy eki birdeı naýqas balanyń jaıy turmys taýqymetin ábden tartqan kelinshekti oblystyq ákimdik ókilderiniń halyqpen kezdesýinde muń shaǵýyna, óz jaǵdaıyn aıtyp, kómek suraýyna májbúrledi. Mine, sol kezde «QazMunaıGaz» Barlaý О́ndirý» aksıonerlik qoǵamynyń enshiles kompanııasy – «Embimunaıgaz» aksıonerlik qoǵamynyń bas­shylyǵy qıynshylyqqa tap bolǵan otbasyǵa járdem berýge sheshim qabyldaıdy. «Jumyla kótergen júk jeńil» demekshi, bul otbasynyń úıin salyp berýge «Embimunaıgazdyń» munaıshylary atsalysyp, óz qarjylaryn aýdarady. – «QazMunaıGaz» aksıonerlik qoǵamynyń kompanııalar toby áleýmettik damýǵa qatysty barlyq  másele boıynsha jergilikti bılikpen tyǵyz áriptestikte jumys atqarady. Biz bul joly Atyraý oblysynyń ákimi Nurlan Noǵaevtyń usynysyn qabyldap, aty­raý­lyq turǵynǵa kómektesýge sheshim shyǵardyq. Em­bilik munaıshylar qıyn jaǵdaıda qalǵan kópbalaly otbasyna kómektesý úshin bir kúndik jalaqylaryn aýdardy. Munaı naryǵyndaǵy qazirgi kúrdeli eko­no­mıkalyq jaǵdaıǵa qaramastan, olar adamdardyń basyna túsken qıyndyqqa  nemquraıdy qaramaıdy, – dedi «QazMunaıGaz» Barlaý О́ndirý» AQ bas dırektory, «Embimunaıgaz» AQ bas dırektorynyń birinshi orynbasary Qurmanǵazy Esqazıev. Ol bul sózdi Gúlbaǵyt Qyzyltashtyń úıiniń sapasyn óz kózimen kórip, qutty  bolsyn aıtýǵa kelgen kezinde aıtty. Jańa úıdiń qurylysyna úsh aı ýaqyt ketken. Sonymen, bıylǵy qazan aıynda bir otbasyn qýa­nyshqa bólep, tirshilikke degen úmit otyn alaýlatyp jańa úı salynyp bitti. Qurylys jumystary kezinde burynǵy eski úıdi bólshektep, syryp tastap, jańa úlgidegi, tipti  shatyry men irgetasynyń da poshymy bólek, jylytý qazandyǵy, allıýmınıı radıatorlary, búkil santehnıkasy bar jap-jańa úı turǵyzyldy. Embimunaıgazdyq munaıshylardyń birligi jarasqan ujymy Qyzyltash otbasynan basqa taǵy da úsh jumysshynyń otbasyna  kómekteskenin de atap ótý qajet. Olar «Embimunaıgaz» AQ-tyń óndiristik qurylymdyq bólimshesi sanalatyn «Jaıyqmunaıgaz» AQ-tyń nóserli jaýyn kezinde úıleri zardap shekken úsh jumyskeri eken. Jalpy, «Embimunaıgazdyń» jumysshylary ótken jyly da Atyraý qalasyndaǵy tórt otbasyǵa kómektesip, bir kúndik jalaqylaryn aýdarǵan. Olar da toqtamaı jaýǵan jańbyrdan úılerin sý alǵan otbasylar bolatyn. Sonda úıinde múgedek balala­ry bar tórt otbasynyń baspanasyn jóndeýden ót­kizip, jalǵyzilikti bir zeınetkerge jańadan turǵyn úı turǵyzyp bergen edi. Mine, adamǵa adamnyń qa­diri osyndaıda bilinedi. Naryq zamany ornady, adamdardyń adamgershilik qasıeti tómendedi, azaı­yp barady dep jıi aıtyp júrsek te, osyndaı nar jigitterdiń tirlikteri kókeıge úmit uıalatady. Qaıyrymdylyqtyń iri-usaq bolyp bólinbeıtinin kórsetedi. Baı bol, kedeı bol – qaıyrymdy bolý mindetiń degen oıǵa jeteleıdi. Al qaıyrymdylyq jasaý qashanda ǵanıbet! Marat AQQUL, «Egemen Qazaqstan»