Qostanaı qalasynda oblystyq ishki ister departamentiniń uıymdastyrýymen erekshe aksııa ótti. Elimiz Táýelsizdigin alǵan jyly dúnıege kelgen polıseıler avtosherýge shyqty. 25 jastaǵy polıseıler qalanyń ortalyq kóshelerimen 25 shaqyrym jol júrdi. Sherýdiń sońynda olar mingen avtomobıldermen «25» sanyn beınelep toqtady.
Qostanaı oblystyq ishki ister departamenti jergilikti polısııa ókili Ádilbek Dánekenovtiń aıtýynsha, polıseıler mundaı aksııany jyl saıyn aıtýly merekelerde ótkizip otyrady.
– El Táýelsizdigine 25 jyl toldy. Qazir elimiz aıtýly merekeniń qarsańynda tur. Biz avtosherý arqyly qostanaılyqtar men qala qonaqtarynyń nazaryn osy aıtýly oqıǵaǵa aýdaryp, merekelik rýhty kótergimiz keldi, – deıdi Ádilbek Dánekenov.
Avtokolonnany Táýelsizdik qurdasynyń biri, polısııa serjanty Rýslan Aıtenov basqardy. Ol 1991 jyly Áýlıekól aýdanynda týǵan. Ishki ister organynda qyzmetin bastaǵanyna úsh jyl boldy, tańdaǵan mamandyǵyn jaqsy kóredi, ózin eldiń patrıotymyn dep sanaıdy. Rýslan áriptesterimen birge avtosherýge muqııat daıyndaldy, onyń eshqandaı qatesiz ótýine úles qosty.
– Halqymyz ádette otbasynda ul týǵanda erekshe qýanǵan. Al sol jyly elimiz Táýelsizdigin alyp, aq túıeniń qarny jarylyp jatqanda ómirge biz kelip, ata-ana qýanyshy eselengen eken. Endi soǵan laıyq bolýymyz kerek, – deıdi Rýslan. Avtosherýge qatysqan polıseılerdiń barlyǵy da bul sherý olar úshin tarıhı oqıǵa bolyp qalatynyn, maqtanysh etetindigin aıtty.
Názıra JÁRIMBETOVA,
«Egemen Qazaqstan»
QOSTANAI