Búgin Aqtóbe oblystyq qylmystyq ister jónindegi mamandandyrylǵan aýdanaralyq sotynda osy jyldyń 5 maýsymyndaǵy terakt boıynsha aıyptylarǵa úkim shyǵaryldy.
Úkim boıynsha 7 adam ómir boıy bas bostandyǵynan aıyrylyp, erekshe rejimde jazasyn óteıdi.
Budan bólek, sot negizgi aıyptalýshylar Jubanov Aıdos pen Abdrahmanov Azamatty 22 jáne 20 jylǵa erekshe rejimde óteýge kesti. Qolǵa túsken 29 kúdiktiniń ishinde 9-y – basty aıyptalýshylar. Olarǵa birqatar qylmystar boıynsha, onyń ishinde terakt jasady degen aıyp taǵylyp otyr. Qylmyskerlerdiń múlki tárkilenip, jazasyn erekshe rejimde óteıdi. Qalǵan 18-ne qylmys týraly quzyrly organdarǵa habarlamaý (QR QK 434 baby), 2-eýine qylmysty jasyrý áreketteri (QR QK 432 baby) boıynsha aıyp taǵyldy.
Sonymen qatar, Aqtóbede 2016 jyldyń 5 maýsymy kúni bolǵan terrorıstik aktige qatysqan Abdrahmanov pen ózge de azamattardyń qylmystyq isteri boıynsha, sot 21 qarasha kúni aıyptalýshylardyń sońǵy sózderin estidi. Birqatar qylmystar jasaǵan, sonyń ishinde terrorıstik akt uıymdastyrdy dep sottalǵandar men aıyp taǵylǵan azamattar istegen áreketterine ókinetinderin aıtyp, sot ókilderine ómir boıyna qamaýǵa alý týraly úkim shyǵarmaý jóninde ótinish jasaǵan.
Aıta keteıik, lańkester «Pallada» jáne «Pantera» qarý-jaraq dúkenderi men №6655 áskerı bólimine shabýyl jasady. Saldarynan 8 adam qaza tapty. Olardyń 3-eýi – áskerı qyzmetker.