Meniń ǵylymı baǵytym – qurylys salasy. Sonyń ishinde IT jáne geoaqparattyq júıeler. Keıingi on bes jyl boıy qurylys alańdarynyń qaýipsizdigi men ekologııalyq áserin baqylaýǵa arnalǵan zamanaýı tehnologııany ázirleýmen aınalysyp kelemin.
Qazir qurylys alańdaryn baqylaýda vıbrosensorlar men mıkrofondy sensorlardy qoldanýǵa basymdyq berip otyrmyz. Bul qurylǵylar qaýipsizdik deńgeıin arttyryp, sapany naqty baǵalaýǵa múmkindik beredi. Sonymen qatar topyraq negizderin modeldeý arqyly onyń ózgerisin aldyn ala boljaý, sý basý qaýpin erterek anyqtaý baǵytynda zertteýler júrgizemiz.
Arnaıy qurylǵylardy topyraqqa engizý arqyly onyń ylǵaldylyq deńgeıi men gıdrofızıkalyq sıpattaryn ólsheımiz. Sonyń nátıjesinde irgetastyń shógý qaýpin erte kezeńde anyqtaýǵa jol ashylady. Bul – qurylys sapasyn arttyryp qana qoımaı, apattyń aldyn alýǵa múmkindik beretin tıimdi tásil. Qazir osy jobalardy ǵylymı maqalaǵa tujyrymdap, halyqaralyq jýrnaldarda jarııalaımyz. Sonymen birge birneshe doktorant pen magıstrantqa jetekshilik etip, ǵylymı kadr daıarlaý isine úles qosyp júrmin.
Ǵylym kúni – jaı ǵana mereke emes. Bul – eldiń bolashaǵyn baıyptaıtyn mańyzdy kún. Búginde elimizde ǵylymǵa degen kózqaras jaqsardy. Jas zertteýshilerge jaǵdaı jasalyp, jańa múmkindikter ashylyp jatyr. Eń bastysy – ǵylymnyń nátıjesi qoǵamǵa qyzmet etýi kerek. Biz osy maqsatta eńbek etip kelemiz.
Elbek О́tepov,
PhD, professor