QR Premer-Mınıstri B.Saǵyntaevtyń tóraǵalyǵymen ótken Úkimettiń kezekti otyrysynda Densaýlyq saqtaý jáne áleýmettik damý mınıstri Jumyspen nátıjeli qamtý jáne jappaı kásipkerlikti damytý baǵdarlamasynyń jobasyn tanystyrdy.
«Jol kartasy 2020» jumyspen qamtý baǵdarlamasynan aıyrmashylyǵy, jańa baǵdarlamada oqý ýaqytynyń 40-60%-y jumys ornynda ótkiziledi. Sonymen qatar, eldi mekender jedel oqytýshy toptarymen qamtylyp, 1-6 aıǵa deıingi aralyqta modýldi oqytý kýrstary ótedi.
«Baǵdarlamanyń basym baǵytynyń aıasynda azamattardyń óz betinshe jumysqa ornalasý jáne óz isin ashý múmkindikterin keńeıtý úshin jappaı qajet mamandyqtarǵa oqytý uıymdastyrylady», – dedi mınıstr.
Qazaqstandyqtar kolledjderdiń bazasynda tegin kásibı bilim ala alady. Birinshi kezekte, bul sharalar jastardy qamtýǵa tıis. Sondaı-aq el azamattary tegin qysqa merzimdi dýaldy bilim berý kýrstarynan ótip, qosymsha mamandyq ıelene alady. Olardy oqytý kolledjderdiń bazasynda, «Atameken» UKP oqytý ortalyqtarynda, jumys berýshilerdiń oqytý ortalyqtarynda júrgiziledi.
Kontıngentti jınaý jáne oqytý aımaqtardyń ekonomıkalyq qajettilikteri men jumys berýshilerdiń suranysyna oraı júrgiziledi.
Arnur ASQAR,
«Egemen Qazaqstan»