Qazaq estradasynda 26 jyl boıy birge án shyrqap kelgen «Nur-Muqasan» dýeti tarap ketti. Bul týraly Muqasan Shahazadaev «Astana» arnasyndaǵy «El aýzynda» baǵdarlamasyna bergen suhbatynda aıtty.
«Nurlan qazir óz shyǵarmashylyǵymen, men óz shyǵarmashylyǵymmen aınalysýdamyn. Buǵan deıin de aıtylǵan bolatyn. Bul tek Nurlan ekeýmizdiń aramyzdaǵy áńgime. Ony jarnamalaǵym kelmeıdi. 26 jyldyń ishinde bir-birimizdi keshirmeıtindeı jaǵdaı bolǵan emes, dese de kishigirim túsinispeýshilikter boldy. Bir jaǵynan, 26 jyl boıy qatty ketpeı, shydap kelgen sııaqtymyz. Qazir Nurlan jaıly eshteńe aıta almaımyn. Beıhabarmyn. Tosyn syı ázirlep jatqan shyǵar. Bir kúni jarq etip shyǵa kelýi de múmkin», - dedi Muqasan Shahazadaev.
Aıta keteıik, 1990 jyly qurylǵan «Nur-Muqasan» dýeti «Qudasha qyz», «Sezimdi qaıtem», «Qos qarlyǵash» hıt ánderimen kópshiliktiń júregin jaýlaǵan bolatyn.