Táýelsizdiktiń 25 jyldyǵyna oraı «25 juldyzdy kún» aıasynda Almaty oblysynda bir kúnde 25 zamanaýı balabaqsha ashyldy. Atalǵan nysandar Ile, Qaratal, Jambyl, Panfılov, Eńbekshiqazaq, Talǵar aýdandary men Taldyqorǵan qalasynda iske qosyldy, dep habarlaıdy QazAqparat.
Qaratal aýdany Úshtóbe qalasynda ashylǵan 320 oryndy «Balbóbek» balabaqshasy «Nurly jol» baǵdarlamasymen salynǵan. Bilim berý mekemesiniń ashylý saltanatyna oblys ákimi Amandyq Batalov qatysyp, quttyqtady.
«Búgin Tuńǵysh Prezıdent kúniniń qarsańynda Qazaqstan Respýblıkasy Táýelsizdiginiń 25 jyldyǵyna oraı «25 juldyzdy kún» aıasynda biz oblys boıynsha zamanaýı 25 balabaqsha ashyp otyrmyz. Bul – oblys turǵyndary úshin asa mańyzdy ári úlken shara. Shyn júrekten barshańyzdy Tuńǵysh Prezıdent kúnimen jáne Qazaqstan Táýelsizdiginiń 25 jyldyǵymen quttyqtaımyn! Zor densaýlyq, tolaıym tabys, otbasylaryńyzǵa bereke tileımin», – dedi A.Batalov.
Munan soń oblys ákimi Memleket basshysynyń balalardy mektepke deıingi tárbıemen qamtý týraly tapsyrmasyn oryndaý baǵytynda óńirde aýqymdy jumystar atqarylyp jatqanyn atap ótti. Máselen, bıylǵy jyldyń ózinde ǵana oblysta 97 balabaqsha paıdalanýǵa berilgen, onyń 88-i – jekemenshik. Sondaı-aq, aımaq basshysy memlekettik-jekemenshik áriptestik arqyly mektepke deıingi mekemeler ashý isi jaqsy jolǵa qoıylǵanyn, búgingi kúni balalardy balabaqshamen qamtý kórsetkishi 87% qurap otyrǵanyn aıtty.
Jalpy, osy kúni 25 balabaqshanyń basym bóligi Almaty qalasynyń mańynda ornalasqan halyq tyǵyz qonystanǵan aýdandarda ashylǵanyn atap ótý kerek. Máselen, Talǵar aýdanynda (Talǵar qalasy, Amangeldi, Qyzyl Tý, Rysqulov, Taldybulaq, Tuzdybastaý, Erkin aýyldary) jalpy sany 800 oryndy 9 balabaqsha, Ile aýdanynda (О́tegen batyr kenti, Jańadáýir, Baıserke, Qoıanqus aýyldary) 520 oryndy 7 balabaqsha, Jambyl aýdanynda (Úmbetáli, Uzynaǵash aýyldary) 470 oryndy 4 balabaqsha, sol sııaqty Eńbekshiqazaq aýdanynda (Jańashar, Túrgen aýyldary) eki balabaqsha, Taldyqorǵan qalasynda jáne Panfılov (Penjim aýyly), Qaratal aýdandarynda (Úshtóbe qalasy) balabaqsha bir-birden ashyldy.
Atalǵan balabaqshalar ashylǵannan keıin oblysta 3-6 jas aralyǵyndaǵy balalardy mektepke deıingi mekemelermen qamtý deńgeıi Jambyl aýdanynda – 94,2%, Talǵar aýdanynda – 89,0%, Panfılov – 85,1%, Ile – 84,1%, Eńbekshiqazaq – 82%, Taldyqorǵan qalasynda 87% kórsetkishke jetti.