Qazaqstan Prezıdenti Nursultan Nazarbaev Brazılııa Federatıvtik Respýblıkasynyń Prezıdenti Mıshel Temerge kóńil aıtý jedelhatyn joldady. Bul týraly Aqordanyń baspasóz qyzmeti habarlady.
Jedelhatta Kolýmbııa Respýblıkasynyń áýe keńistiginde bolǵan ushaq apaty saldarynan Brazılııa azamattarynyń qaza bolǵany týraly habardy Nursultan Nazarbaevtyń zor kúızelispen qabyldaǵany aıtylǵan. «Qaza bolǵandardyń týystary men jaqyndaryna, sondaı-aq, barsha Brazılııa halqyna aýyr qaıǵylaryna ortaqtasyp, Qazaqstan halqynyń jáne jeke ózimniń atymnan kóńil aıtamyn», - delingen jedelhatta. Memleket basshysy zardap shekkenderdiń tezirek saýyǵyp, otbasylaryna oralýyna tilektestik bildirdi.