Qyzylorda oblysynda 1 jeltoqsan – Qazaqstan Respýblıkasynyń Tuńǵysh Prezıdenti kúnine oraı ishki ister organdarynyń úzdik qyzmetkerleri marapattalyp, merziminen buryn ataq-shender tapsyryldy, dep habarlady oblystyq Ishki ister departamentiniń baspasóz qyzmeti.
Saltanatty sharada Ishki ister mınıstri Qalmuhanbet Qasymovtyń quttyqtaý haty oqylyp, 1 jeltoqsan merekesine arnaıy túsirilgen «Tuńǵysh Prezıdenttiń ómir joly» atty beınerolık kórsetildi.
«Memleket basshysy Nursultan Nazarbaevtyń salıqaly basshylyǵymen halqymyz Táýelsizdik Týyn bıikke kóterip, damýdyń jańa jolyn tańdady. Bul kúnniń Elbasymyzdyń atymen atalýynyń ózi kezdeısoq jaǵdaı emes. Sebebi bul kún – qazaq halqynyń memleket bolyp qalyptasýynyń mańyzdy kezeńin aıqyndaıdy», – dedi jıynda oblystyq Ishki ister departamentiniń bastyǵy Qaırat Muhıtov.
Merekelik shara barysynda qoǵamdyq tártipti qamtamasyz etip, halyqtyń quqyǵy men bostandyǵynyń qorǵalýy jolynda erekshe kózge túsip, úzdik nátıjelerge qol jetkizgeni úshin ishki ister organdarynyń 150-ge jýyq qyzmetkeri marapattaldy. Marapattalǵandardyń qatarynda quqyq buzýshylyqtarmen kúresip, quqyqtyq tártipti qamtamasyz etý jolynda aıanbaı eńbek etip júrgen tómengi qurylym qyzmetkerleri, aýdandyq ishki ister bólimderi, Qalalyq ishki ister basqarmasy men IIM-niń Baıqońyr qalasyndaǵy ókildigi qyzmetkerleri de bar. Sonymen qatar, merziminen buryn arnaıy ataqtar men synyptyq shendik tapsyryldy.