«Baıterek Development» aksıonerlik qoǵamynyń burynǵy basqarma tóraǵasy Baqyt Jaqsybaev tutqyndaly, dep habarlaıdy jemqorlyqpen kúres ulttyq bıýrosynyń baspasóz qyzmeti.
Osy iske qatysty málimetterden belgili bolǵanyndaı, asa iri kólemde para aldy dep aıyptalǵan «Baıterek Development» AQ-nyń laýazymdy tulǵalaryna qatysty fakti boıynsha, qylmystyq shemany uıymdastyrýshylardyń biri – burynǵy basqarma tóraǵasy, qazirgi tańda QR Ulttyq ekonomıka mınıstrliginiń «Qazaqstandyq turǵyn úı kommýnaldyq sharýashylyǵyn damytý men jańǵyrtý ortalyǵy» AQ-nyń basqarma tóraǵasy B.Jaqsybaev tutqyndaldy.
«Baqyt Jaqsybaev qylmystyq áreketke qatysýshylardyń barlyǵynyń áreketterine jetekshilik etip, olardyń arasyndaǵy rólderdi bólip, alatyn paralarynyń mólsherin bekitip otyrǵan», – dep túsindirdi jemqorlyqqa qarsy kúres vedomstvosynyń ókilderi. 2016 jyldyń 30-qarashasynda atalǵan azamatqa qatysty Almaty aýdandyq №2 sotynyń sanksııasy negizinde «qamaýǵa alý týraly» shara qoldanyldy.
Aıta keteıik, osyǵan deıin aýdandyq sottyń sanksııasy negizinde «Baıterek Development» AQ basqarma tóraǵasynyń orynbasary Jaqypov, Memlekettik jáne jekemenshik seriktestigi dıreksııasy departamentiniń jetekshisi Aıtymbetov, burynǵy jáne qazirgi basqarýshy dırektorlar Anarbaı jáne Sarıev, «Project City Group» JShS-niń jetekshileri Smaǵulov, Esmuqanov, Jumanazar men Komarov tutqyndalǵan bolatyn. Atalǵan azamattardyń barlyǵyna «Nurly jol» memlekettik baǵdarlamasynyń aıasynda óńirlerde jalǵa beriletin turǵyn úılerdi qurylysyn júrgizý úshin qajetti memlekettik qyzmetterdi satyp alý kezinde qurylys kompanııalaryna basymdyq bergeni úshin júıeli túrde asa iri kólemde para aldy degen aıyp taǵylyp otyr. Osyǵan deıin habarlanǵanyndaı, 13 kásiporyn tartylǵan qylmystyq shema respýblıkanyń barlyq aımaqtary: Oral, Kókshetaý, Aqtóbe, Taraz, Taldyqorǵan qalalary boıynsha júzege asyrylǵan.