Elordanyń Táýelsizdik saraıynyń ǵımaratynda el tarıhynyń árbir jylynyń basty oqıǵalary men jetistikteri týraly baıandaıtyn «Táýelsizdik jylnamasy - 25» fotokórmesi ashyldy, dep habarlady Astana ákimdiginiń baspasóz qyzmeti.
Ony Astana qalasynyń ákimdigi «National Geographic Qazaqstan» jýrnalymen birlesip uıymdastyrdy.
Qazaq eliniń sońǵy shırek ǵasyrdaǵy qalyptasý kezeńi, ataýly kúnderi, eleýli oqıǵalary men júrip ótken jolyn eske salyp, kórsetetin kórmege Qazaqstan jáne sheteldik fotomamandardyń 80-nen astam eńbegi usynylady.
«Barlyǵyńyzdy kele jatqan merekelermen quttyqtaımyz. Qazir saraıda túrli oqıǵalar oryn alyp jatyr. Bıyl Táýelsizdigimizdiń 25 jyldyǵyn merekeleýdemiz. Osy mereke qarsańynda «táýelsizdik» ataýy bar osy saraıda Qazaqstan jylnamasynyń kórmesin ashyp otyrmyz. Bul jerde fotosýretter arqyly elimizdiń tarıhy, tabıǵaty jáne baılyǵy týraly syr shertetin 90-nan astam jumys qoıylǵan», – dedi Táýelsizdik saraıynyń dırektory Ásel О́mirshına.
Fototilshiler óz týyndylaryn bul kórmege qoıý arqyly Qazaqstannyń baı mádenı murasyna, tól tarıhyna, ulttyq bastaýyna degen mahabbaty men qurmetin kórsetýdi aldaryna maqsat etip qoıyp otyr. Egemendigimizdiń 25 jyldyq mereıtoıyna arnalǵan fotokórme qarashanyń 30-nan bastap jyl sońyna deıin Astanadaǵy Táýelsizdik saraıynyń negizgi kórme zalynda ótedi.