Qazaqstannyń halyq artısi, Memlekettik syılyqtyń ıegeri, skrıpkashy Aıman Musaqojaeva otandastarymyzdyń jemisti eńbek jolyn nasıhattaýdy kózdeıtin ulttyq «Tabystyń 100 qadamy» jobasynyń kezekti keıipkeri.
Skrıpkada oınaý úshin óte názik estý qabileti men eńbektený, tabandylyq bolýǵa tıisti. О́ıtkeni bul aspap kinámshyl, kirpııazdyǵymen erekshe. Aıman mektepte oqyǵan kezinen tańǵy saǵat 6-da turyp skrıpkasyn qolyna alyp, repetıtorııaǵa baryp, sabaq bastalǵansha daıyndalatyn. Anasynyń «eshkimniń qolyna qarama, óz eńbegińe sen» degen aqyly áli esinde. Keshki ýaqytta daıyndalyp turyp ózi sekildi kishkene balalardyń, synyptastarynyń aýlada asyr salyp oınap jatqanyn estise de, skrıpkanyń qyr-syryn meńgerýge eresektershe den qoıatyn. Mýzykaǵa qushtarlyǵy bárin umytyryp, berile oınaıtyn.
Qojabek pen Rahıla Musaqojaevtardyń tórt qyzy qazdaı tizilip bir ınternatta oqydy. Bir salaǵa, ishekti-ysqyly aspaptarda oınap úırenýge bardy. Jaı oqyp qoıǵan joq, Raısa men Aıman skrıpkany, Raýshan qylqobyzdy, Baqytjan vıolochel aspaptaryn sheber meńgerip, qazirgi kezde de bir oqý ordasynda - Astanadaǵy Qazaq ulttyq mýzyka ýnıversıtetinde qyzmet etýde.
Alǵa qoıǵan maqsatyna boıyndaǵy jigerimen, eńbegimen jete biletin Aıman respýblıkalyq K.Baıseıitova atyndaǵy daryndy balalardyń respýblıkalyq mýzyka mektebinde professor N.Patrýshevada oqydy. Ári qaraı Máskeýdegi P.Chaıkovskıı atyndaǵy memlekettik konservatorııada áıgili professor V.Klımovtyń klasynda oqýyn jalǵastyrdy.
Onyń repertýarynda álem mýzykasynyń jaýharlarynan I.S.Bah, I.Gaıdn, V.A.Mosart, L.Bethoven, N.Paganını, A.Hachatýrıan, I.Brams, P.Chaıkovskıı, sııaqty kompozıtorlar týyndylary men KSRO halyq artısi E.Rahmadıev, zamandasy S.Erkinbekov sekildi otandyq sazgerler shyǵarmalary oryn alǵan. Sonymen birge mýzykant tyńdarmandaryna únemi jańa, zamanaýı mýzykalardy oınaıdy.
Týmysynan qaısar minezdi Aımannyń alǵashqy jeńisi osydan 40 jyl buryn Belgradta ótken Halyqaralyq konkýrsta boldy. 18 jasar qazaq qyzy oınaǵan kúrdeli shyǵarmasymen de, myqty tehnıkasymen de, sırek kezdesetin mýzykalyq oıjosyǵymen de tyńdaýshylaryn tań qaldyrdy. Osy kezden bastap Aıman Qojabekqyzynyń tabysty shyǵarmashylyq joly bastaldy. 1980-shi jyldary ol 4 halyqaralyq konkýrsta jeńimpaz atandy!
Skrıpkashy jeke oryndaýshylyq shyǵarmashylyǵymen qatar ustazdyq, uıymdastyrýshylyq, qoǵamdyq eńbek jolyn tepe-teń ustady. 1992 jyly Memlekettik «Solıster akademııasy» Kameralyq orkestrin quryp, kórkemdik jetekshi boldy. Baı repertýarly bul ujymynyń kásibı oryndaýshylyǵyn jaqyn jáne alys shetelderdegi has skrıpkashylar joǵary deńgeıde baǵalady. Sonymen qatar A.Musaqojaeva jıyrma jyldan astam ýaqyt Chaıkovskıı atyndaǵy (Reseı), Abram Iаmpolskıı atyndaǵy (Dýbna), Mıkelanjelo Abbado atyndaǵy (Italııa) Halyqaralyq skrıpkashylar konkýrsynyń qazylar alqasynyń turaqty múshesi.
Pedagogıkalyq eńbek jolynda ol halyqaralyq deńgeıde Dúısen Ordabek sekildi talaı skrıpkashyny tárbıeledi. Olar elimizde de, shetelderde de qyzmet etip júr. «О́mirdiń bári jeńisten, tabystan turmaıdy. Jaratýshy adamǵa ózindegi kemshiliktermen jumys jasap, jetildire úsý úshin jeńilisterdi de beredi. Árıne sondaı kezde ózińe syrt kózben qarap, sheberligińdi odan ári damyta túsesiń», – deıdi skrıpkashy.
Astanadaǵy 1998 jyly Qazaq Ulttyq mýzyka akademııasynyń qurylýy Aıman Qojabekqyzynyń úlken armany edi. Elbasynyń qoldaýymen otandyq ónerdiń damýyna jol ashatyn Oqý ordasy ashyldy.
A.Musaqojaevanyń usynýymen qazirgi Ýnıversıtette úsh deńgeıli bilim júıesi – bastaýysh, orta jáne joǵary bilim berý júzege asyrylýda. Munda túımedeı bop kelgen jas daryndar mýzykalyq bilimdi birtindep kásibı ıgerip, iri óner tulǵalarynan dáris alyp, qalyptasqan mýzykant bop bitirýde. Talapty jastarǵa bilim alýǵa barlyq múmkindikter jasalǵan. Sonymen birge kásibı shyńdalý jolynda QazUMÝ Máskeý konservatorııasy, Parıj, Helsınkı, Horvatııa mýzykalyq akademııalarymen ózara tájirıbe almasý baǵytynda mańyzdy kelisimsharttar jasalýda.
Skrıpkashynyń osyndaı iri bilim berý ortalyǵy mýzykanyń barlyq baǵyttarynda belsendi ónerpazdardy tárbıelep, Qazaqstan óneriniń ósýine damylsyz úlesin qosa bermek.
Baqyt JOLDYBAIQYZY