2015 jyly Eýrazııalyq Top (ERG) basshylyǵynyń sheshimimen onyń quramyna kiretin «Eýrazııalyq energetıkalyq korporasııa» AQ Aqsý elektr stansasy resýrstaryn paıdalaný arqyly Rýdnyı qalasy men Qashar kentine elektr energııasyn tasymaldaý múmkindigi týdy. Nátıjesinde, Rýdnyıda elektr qýatynyń tarıfi 10 paıyzdan artyq tómendep, ústimizdegi jyldyń aıaǵyna deıin baǵa ózgermeı qaldy. Endi kompanııa basshylyǵy 2017 jylda da tarıfti turaqty ustap turýdyń múmkindikterin tapty.
Aıtpaqshy, bul sheshim qabyldanbas buryn qalaǵa elektr energııasy Ekibastuz MAES-1-den jetkiziletin jáne ondaǵy 1 kVt-nyń quny Aqsý stansasynyń bosatý baǵasynan áldeqaıda qymbat boldy. Al 2015 jyldyń 1 sáýirinen bastap elektr energııasyna aqy tóleý kezindegi kvıtansııalardy toltyrǵanda tutynýshy 1kVt-tyń baǵasyn jyl basynda bekitilgen 16,11 teńgeniń ornyna 14,46 teńge dep belgiledi. Osylaısha, jyl qorytyndysy boıynsha jeke tulǵalar – 87 mıllıon, al zańdy tulǵalar – 97,6 mıllıon teńge, barlyǵyn qosqanda 184 mıllıon teńge únemdedi.
Ústimizdegi jyldyń sońyna deıin bul úrdis jalǵasyn tabady. Elektr energııasyna tólenetin qarjy kelesi jyly da únemdeletin bolady.
– Biz tómendetilgen tarıf boıynsha tóleýge úırenip aldyq. Al elimiz úshin ekonomıkalyq qıyn kezde, ádette, baǵalardyń ósýin kútemiz. Kenshiler qalasynyń turǵyndary elektr energııasynyń tólemin arzan tóleıtin boldyq. Bul biz úshin óte qýanyshty jaǵdaı, – deıdi zeınetker Valentına Maslova. – Sondyqtan Eýrazııalyq Top basshylyǵyna halyqqa jasap jatqan qamqorlyǵy úshin zor alǵysymdy bildiremin.
– Men Reseıde turatyn tanystaryma bizde elektr energııasynyń tarıfi tómendegenin aıtqanda, olar maǵan sengen joq. Sebebi, barlyq jerde tek ósim baıqalady. Endi mundaı baǵa kelesi jyly da saqtalatyndyǵymen maqtana alamyn. Bul el Táýelsizdiginiń 25 jyldyǵy merekesi qarsańynda úlken syı bolyp, qýanyshymyzdy eseleı tústi, – dep tolyqtyrady taǵy bir aǵa urpaq ókili Maqsut Altynbaev.
Eýrazııalyq Top úshin bıznestiń áleýmettik jaýapkershiligi basym baǵyttardyń biri bolyp qala bermek. Rýdnyı men Qasharǵa tasymaldanatyn arzan elektr qýaty bul – turǵyndardyń áleýmettik áleýetin arttyrý, turmysyn jaqsartý baǵytyndaǵy jumystardyń bir parasy ǵana.
Názıra JÁRIMBETOVA,
«Egemen Qazaqstan»
RÝDNYI