«Bizdiń baqytymyzdyń onnan toǵyzy densaýlyǵymyzǵa baılanysty» demeı me, nemis oıshyly A.Shopengaýer. Densaýlyǵy nashar adamǵa tabys ta, baılyq ta, marapat ta, mansap ta qajet bolmaı qalady. О́ıtkeni ol mazasyz tirlik keship, eń basty baılyǵynan aıyrylǵan jan.
Shynynda, tabıǵattyń eń qymbat jemisi – deni saý adam. Elimizdiń densaýlyq saqtaý salasynda talaı tájirıbeli, daryndy, jańashyl, bilimdi kásibı mamandar qyzmet etip júr. Olardyń arasynda ákeli-balaly dárigerler de bar. Solardyń biri Ádiljan Álbazarov. Onyń alǵashqy ustazy, keńesshisi, baǵyt berýshisi, tájirıbesimen bólisýshi óz ákesi torakaldyq hırýrg Baýyrjan Álbazarov.
Hırýrgııa salasynyń ishindegi san tarmaqty baǵyttardy zertteı kele ol torakaldi (latyn sózinen aýdarǵanda «keýde kletkasy» maǵynasyn beredi) hırýrgııamen aınalysýdy qalady. Bul baǵyt elimizdiń medısınasyndaǵy endi-endi kúsh alyp damı bastaǵan baǵyttardyń biri.
Ádiljan 2000 jyly S.D.Asfendııarov atyndaǵy Qazaq memlekettik Medısına ýnıversıtetin támamdaǵan kezde bul salada mamandardyń jetkiziliksiz bolǵany da ras. Astanadaǵy «Ulttyq Ǵylymı medısınalyq ortalyqtyń» kardıolog dárigeri Ádiljan Álbazarov ártúrli júrek aqaýlaryna qan joly tetigin ornatý, árqıly formadaǵy júrek keselderin hırýrgııalyq emdeý, qolqa qaqpaqshasy men negizderin qaıta jasaýda birneshe operasııalardy sátti jasaǵan maman. Bul jetistikke ol talaı izdenistermen jetip otyr. AQSh-tyń Merıland Ýnıversıtetinde bilim jetildirip kelgen soń, áli de medısına ǵylymy salasynda almaq asýlary bar ekenin túsindi. Sóıtip, ol 2003-2007 jyldary Máskeýdiń A.N.Bakýlev atyndaǵy júrek-qan tamyrlar ǵylymı Hırýrgııa ortalyǵynda aspırantýrada oqyp, medısına ǵylymynyń doktory, professor M.M.Alshıbaıada kandıdattyq eńbegin qorǵap shyqty.
Bul jaýapkershilikti talap etetin, adam boıyndaǵy eń kúrdeli de, mańyzdy júrektiń dárigeri bolýǵa da ózińe senimdilik qajet. «Tabystyń bári baılyqqa ákelmeıdi. Baılyqty basyńdaǵy jınaǵan bilimiń dep túsinemin. Ony eshkim tartyp ta, urlaı da almaıdy», - dedi dáriger.
Ádiljannyń áriptes onnan asa shákirtteriniń birqatary aımaqtarda kardıoortalyqtardyń jetekshileri. «Men úshin qyzmetińe adaldyq, eńbekke qabilettilik, jaýapkershilik óte mańyzdy», - deıdi dáriger. Ádiljan bala kezinde kosmonavt bolyp, sheksiz ǵalamǵa saıahattaýdy armandady. О́se kele ákesi sekildi dáriger bop, aınalasyndaǵy adamdarǵa kómektesýdi mańyzdy dep túsindi. Bos ýaqytyn dúnıejúzi tarıhyn oqyp, taný qyzyǵýshylyǵyna arnaıdy. Al armanyna kelsek, ol da izgilikke negizdelipti. Bolashaqta júrek keselderin emdeýge járdemdesetin qor ashyp, qaıyrymdylyq is-sharalarymen aınalysý...
Kúrdeli de ózektiligi árdaıym joǵary salada ózine degen senimmen qyzmet etip júrgen Ádiljan áli talaı júrekterdi emdemek.
Maqala «100 tabys tarıhy» ulttyq joba aıasynda Din isteri jáne azamattyq qoǵam mınıstrliginiń tapsyrysy boıynsha «Álem» Volonterlyqortalyǵymen daıyndalǵan.
Aıan ÁBDÝÁLI