Akıhıto 1940-1952 jyldar aralyǵynda Gakýshıýın kolledjinde oqyǵan. Bastaýysh mektepte oqyp júrgende soǵys bastalyp, basqa da oqýshylarmen birge Tokıo qalasynan Nıkko jaqqa kóshiriledi. Akıhıto Nıkkoda 1945 jylǵa deıin turady. 1952 jyly Gakýshıýın ýnıversıtetiniń saıasat jáne ekonomıka fakýltetiniń saıasattaný bólimine oqýǵa qabyldanady. Ol Gakýshıýınde bilim alýmen qatar japon tarıhy, Ata Zań, japon ádebıeti, t.b. pánder boıynsha qosymsha sabaq alady. Osy jyldyń qarasha aıynda Akıhıto resmı túrde murager hanzada atanady. 1953 jyly stýdent kezinde Soltústik Amerıka men Batys Eýropanyń 14 memleketine alty aılyq saıahat jasaǵan. Osy saparynda ol Shıova ımperatorynyń ókili retinde Elızaveta II-niń Londonda ótken taqqa otyrý saltanatyna qatysady.
Akıhıto ýnıversıtetti 1956 jyly bitirip, 1959 jyldyń sáýirinde Shıoda Mıchıkoǵa úılenedi. Premer-mınıstr basqaratyn Saraı Keńesi Akıhıtonyń Mıchıkoǵa úılenýine jasyryn túrde kelisim beredi. Murager hanzadanyń úılený salatanatyn tamashalaýǵa 500 000 adam jınalǵan desedi. Bul oqıǵa soǵystan keıingi Japonııa úshin alǵashqy zor qýanyshtyń biri edi.
1989 jyldyń 7 qańtarynda Akıhıtonyń taqqa otyrýy memlekettik mańyzy bar rásim ári dinı ǵuryp «daıdjıoýsaı» retinde atalyp ótedi. Akıhıtonyń taqqa otyrý saltanatyna 158 memlekettiń basshylary, halyqaralyq uıymdardyń jetekshileri qatysady. «Men ómir boıy halqymmen birge bolamyn jáne Ata zańdy saqtaımyn» dedi ol, sóılegen sózinde. Kelesi kúni japon tarıhyndaǵy jańa kezeń, Akıhıtonyń bılik dáýiri «Heıseı» bastalady.
Búginge deıin mártebeli ımperator Akıhıto men onyń jubaıy 37 memlekette resmı saparmen bolǵan. Akıhıto bıologııamen, ıhtıologııamen aınalysady. Japonııa ıhtıologtar qoǵamynyń múshesi retinde teńiz balyqtary jaıynda 30 ǵylymı eńbegi jaryq kórgen. Imperator Akıhıto Japonııadaǵy balyq ataýlyny sýretterimen tanystyratyn «Japon arhıpelagynyń balyqtary» (1984) degen kitaptyń shyǵýyna uıytqy bolǵan ǵalym. 1985 jyly Úndi jáne Tynyq muhıttardyń balyqtaryna arnalǵan ekinshi dúnıejúzilik konferensııany basqarǵan.
1986 jyly Londonnyń Lınnean qoǵamynyń, 1992 jyldan London zoologııalyq qoǵamynyń jáne 1997 jyldan Argentınanyń jaratylystaný ǵylymdary ınstıtýtynyń qurmetti múshesi atanady. Sondaı-aq halyqaralyq bıologtar qoǵamynyń múshesi bolyp qabyldanady. Imperator Akıhıto 100 ǵalymnyń basyn qosyp, ımperator saraıyna qarasty ormandardaǵy jasyl tabıǵat pen ańdardy qorǵaýǵa arnalǵan ǵylymı jobany daıyndaǵan.
Osy jobaǵa kiretin saraıdyń Fýkıage baǵy kópshilik nazarynan jasyryn ósirilýde. Jasyl jelekke oranǵan bul baqtyń bir sheti ǵana 2007 jyldyń mamyr aıynda bir top adamǵa tanystyryldy. Imperator Akıhıto sondaı-aq Avstralııa murajaıynyń ǵylymı qyzmetkeri. Ol 1998 jyly ǵylymǵa sińirgen ólsheýsiz eńbegi úshin London monarhııalyq qoǵamy taǵaıyndaıtyn Korol Charlz II medalynyń tuńǵysh ıegeri atanǵan. Akıhıto tarıhty qadirleıtin, mádenı qundylyqtardy syılaıtyn ımperator retinde tanymal. Ol 1992 jyly «Science» jýrnalynda «Early Cultivators of Science in Japan» maqalasynda alǵashqy japon ǵalymdaryn eýropalyq oqyrmandarǵa tanystyrǵan.
Mártebeli ımperator sondaı-aq otbasymen saraı qaramaǵyndaǵy ormandy kútý, egistik jerlerdi baptaý sııaqty jumystarǵa da aralasady. Imperator áýletine tán ejelden kele jatqan dástúr boıynsha saraı aýmaǵyndaǵy kúrish alqaptaryndaǵy jumystarǵa da qatysady. Akıhıtonyń ákesi Shıova ımperatorynyń 1927 jyly engizgen erejesine saı, saraı ózine qajetti kúrishti óz egistiginde ósirýi kerek. Imperator Akıhıto egin jınaý maýsymynda kúrish orýmen de aınalysady. Qarapaıymdylyq qundylyqtardy baǵalaıtyn el basshysy zaıyby ekeýi el ómirindegi sharalarǵa qatysyp, qoǵamnyń bir bóligi ekendigin tanyta biledi. Osy ýaqytqa deıin mártebeli ımperator men hanshaıym balalar men múgedekterge arnalǵan 400-den astam is-sharaǵa qatysqan. Japonııadaǵy tabıǵı apattar oryn alǵan óńirlerge de ýaqytynda baryp, turǵyndarmen kezdesip, jyly sózderin jetkizýdi ózderine mindet dep biledi. Máselen, 1995 jylǵy orasan zilzaladan zardap shekken Hıogo prefektýrasyna tikushaqpen baryp, aımaqty shaǵyn avtobýspen tańerteńnen keshke deıin aralap, jaǵdaımen tikeleı tanysqandyǵyn aqparat quraldary jazdy.
Imperator áýleti ulttyq óner men ádebıetti qasterleıdi. Tarıhy ejelgi «Manıoshıý» antologııasynan bastalatyn vaka jyryn búgingi ımperator áýletiniń músheleri de jaza biledi. Murager hanzada keziniń ózinde Akıhıto men jubaıy ózderiniń jyr jınaǵyn shyǵarǵan. Imperator Akıhıto halyqtyń suraýymen 1997 jyly jańa jyrlaryn bastyrdy. Qańtar aıynda ımperator saraıynda dástúrli jańa jyldyq múshaıra ótip turady. Osyndaı ádebı keshte ımperator áýletiniń músheleri jazǵan vaka jyrlary men qarapaıym turǵyndar shyǵarǵan óleńder oqylyp, iriktelgen jyrlar jınaq etip baspadan shyǵarylady. 1999 jyly mártebeli ımperatordyń taqqa otyrýynyń on jyldyǵyna oraı onyń «Mıchı» (Jol) dep atalatyn jınaǵy shyqty. Bul kitapqa mártebeli ımperatordyń baıandamalary men vaka poemalary engen.
Mártebeli hanshaıym Mıchıkonyń balalar jazýshysy ekendigin kópshilik bile bermeıdi. 1991 jyly «Hadjmeteno ıamanoborı» (Alǵash taýǵa shyǵýym) degen balalarǵa arnalǵan áńgimeler jınaǵy sýretti kitap bolyp jaryq kórdi. 1992 jyly balalar jazýshysy Mıchıo Madonyń «Doýbýtsýtachı» (Ańdar), «Fýshıgına poketto» (Tańǵajaıyp dorba) degen eki kitabyn mártebeli hanshaıym aǵylshyn tiline ózi aýdaryp, sýretti kitap túrinde AQSh-ta bastyryp shyǵardy.
Mártebeli hanshaıymnyń aýdarýynyń arqasynda Mıchıo Mado Azııada alǵashqy bop Gans Hrıstıan Andersen atyndaǵy syılyqqa ıe boldy. 1998 jyly balalarǵa arnalǵan Gans Hrıstıan Andersen atyndaǵy syılyqty taǵaıyndaıtyn komıssııanyń ótinishi boıynsha mártebeli hanshaıym «Reminiscences of Childhood Readings» degen taqyrypta baıandama jasap, onyń mátini eki tilde shyqqan «Building Bridges» degen kitapqa endi. Keıin bul kitaptar basqa da shet tilderine aýdaryldy. Mıchıko hanshaıym 2002 jyly Andersen atyndaǵy syılyqty taǵaıyndaıtyn uıymnyń shaqyrýymen Shveısarııadaǵy Bazel qalasynda balalar ádebıetine arnalǵan kongreske qatysyp, sóz sóıledi. Ol eńbegi «From Basel – to those who bring books and children together» degen taqyrypta kitap bolyp jaryq kórdi. 2005 jyly mártebeli hanshaıymnyń vaka jyr jınaǵy aǵylshyn jáne japon tilderinde jaryq kórdi.
Mártebeli ımperatordyń jary Shıoda Mıchıko 1934 jyldyń 20 qazanynda Tokıoda týǵan. Un tartatyn iri kompanııanyń basshysy Shıoda Hıdesabýronyń úlken qyzy. Ata-anasy zııaly adamdar bolǵan. Bul áýlettiń eki múshesi kórnekti ǵalymdarǵa taǵaıyndalatyn ımperatordyń «Mádenıetke sińirgen eńbegi úshin» joǵary akademııalyq nagradasymen marapattalǵan. Shıoda Mıchıko Fýtaba bastaýysh mektebinde bilim alyp, Tokıonyń Áýlıe Júrek ýnıversıtetin támamdaǵan. Stýdentter uıymyn basqarǵan ol sol kezdiń ózinde meıirimdi, dostyqqa adal jan retinde tóńiregine tanylǵan. Búginde Japonııanyń «Qyzyl jarty Aı» qoǵamynyń Qurmetti Prezıdenti bolyp otyrǵan mártebeli hanshaıym ádebıet pen ónerge jaqyn, pıanıno men arfada oınaıdy, keste tigip, toqyma toqıdy. Baqshadaǵy gúlderdi kútkendi jaqsy kóredi. Mıchıko hanshaıym ımperator áýletiniń ansamblinde pıanıst, aqsúıek mýzykanttardan quralǵan Gagaký saraı ansamblinde de óner kórsetedi. О́ner festıvalderiniń ótýine de uıytqy bop júr.
2009 jyldyń sáýir aıynda mártebeli ımperator men hanshaıymnyń úılengenine 50 jyl tolýyna baılanysty saltanatty shara ótkizildi. Imperator saraıynda ótken altyn toıǵa Japonııadaǵy úılengenine elý jyl tolǵan barlyq juptar qonaq retinde shaqyryldy.
О́ziniń eńbeksúıgishtigimen kópshiliktiń qoshemetine bólengen mártebeli hanshaıym balalaryn tárbıeleýde eshkimge salmaq salmaǵan desedi. Monarhııalyq áýletterge tán bala kútýshi, aspaz, jeke qyzmetshi degenderdiń birin de ustamaǵan. Úsh balasyn da kútýshiniń kómeginsiz ózi baǵyp, tárbıelegen. Hanshaıym tańerteń balalaryn mektepke jibererde olardyń túski tamaǵyn ózi ázirlep, sómkelerine salyp beredi eken. Mártebeli ımperator press-konferensııalardyń birinde aıtqanyndaı, Mıchıko hanshaıym kózi tirisinde ata-enesin de erekshe qurmettegen. Akıhıtonyń anasy 2000 jyly dúnıe salǵanǵa deıin Mıchıko hanshaıym apta saıyn baryp, hal-jaǵdaıyn surap turǵan.
Mıchıko hanshaıymnyń taǵy bir daralyǵy, ol ımperator saraıyndaǵy ortalyqta jibek qurtyn ósirýmen aınalysady. Bul dástúrdi Akıhıtonyń ájesi, Meıdzı ımperatordyń zaıyby Shıoýken 1871 jyly bastaǵan desedi. Mıchıko hanshaıym tut aǵashynyń alqaptaryn aralap, jibek óndirýdiń búkil prosesterine ózi aralasady. Jibek qurtyn tut aǵashynyń japyraqtarymen qorektendirý isimen de ózi shuǵyldanady. Saraıǵa qarasty ortalyqta hanshaıymnyń óz qolynan shyqqan jibek jipterden kezdeme toqylady. Bul kezdemeler Naradaǵy Shıoýsoýın dep atalatyn saraıda saqtalǵan myńdaǵan jyldyq tarıhy bar kóne jádigerlerdi restavrasııalaýǵa paıdalanylady.
Imperator Akıhıto men Mıchıko hanshaıymnyń Narýhıto, Akıshıno esimdi eki uly men Saıako degen qyzy bar. Murager hanzadany ımperator saraıyndaǵy Keńes saılaıdy. Bul Keńesti premer-mınıstr basqarady, quramyna ımperator áýletiniń músheleri, parlamenttiń keńesshiler palatasy men ýákilder palatasynyń spıkerleri, Joǵary sottyń bas sýdıasy kiredi.
Murager hanzadany japondar «koýtaıshı» deıdi. Al taq murageri, ıaǵnı ımperatordyń nemeresi koýtaıson (ımperatordyń uly nemeresi) dep atalady. «Murager hanzada» tıtýly týraly jazba derekter ÚII ǵasyrdan jetken. Buǵan deıin taq murageri ataýyn beıneleýde eki ıeroglıften turatyn «ooe» (uly aǵa) tıtýly qoldanylǵan. 1949 jylǵy «Imperator áýleti týraly zańnyń» 8-shi taraýynda ımperatordyń murager uly «murager hanzada» dep jazylǵan.
Murager hanzada Narýhıto 1960 jyly 23 aqpanda dúnıege kelgen. 1982 jyly Gakýshıýın ýnıversıtetiniń ádebıet fakýltetiniń tarıh bólimin bitirgen. Japon kóliginiń orta ǵasyrlyq tarıhyn zerttegen. Odan soń Ulybrıtanııadaǵy Oksford ýnıversıtetiniń aspırantýrasynda oqyǵan. Narýhıto HÚIII ǵasyrdaǵy Temza ózenindegi kólik qatynasy týraly zertteý júrgizgen.
Murager hanzada 1988 jyldyń naýryz aıynda doktorantýranyń 1-shi dárejesin bitiredi. Gakýshıýın ýnıversıtetinde arnaýly leksııalar oqıdy. Qazir mártebeli hanzada ýnıversıtettiń Tarıhı zertteýler ortalyǵynyń múshesi. 1991 jyly qurmetti ǵylym doktory ataǵyn alǵan. 1991 jyldyń aqpan aıynda murager hanzada tıtýlyn alǵannan beri Narýhıto Akıhıto áýletiniń ókili retinde shet elderge resmı is-saparlarmen baryp turady. Sonymen qatar ol qoǵamdyq jumystarmen aınalysady. Kezinde ata-anasy atqarǵan múmkindigi shekteýli jandarǵa arnalǵan olımpıada oıyndarynyń ashylýyna qatysý tárizdi fýnksııalardy da murager hanzada atqarýda.
Murager hanzada Narýhıto jas kezinen qabiletimen erekshelenipti. Tórt jasynan bastap skrıpkada oınaǵan. Gakýshıýın ýnıversıtetiniń orkestrine qabyldanǵan soń altqa aýysqan. Stýdent kezinde dostarymen birge shekti aspaptar ansamblin qurady. Murager hanzada sondaı-aq «Japon alpınıster qoǵamynyń» múshesi retinde alpınızmmen shuǵyldanady, tennıspen áýestenedi.
1986 jyly 26 jasar Narýhıto bolashaq jary Ovada Masakomen saltanatty qabyldaýda tanysqan. Imperatordyń úlken kelini Ovada Masako 1963 jyly Tokıoda týǵan. Syrtqy ister mınıstriniń orynbasary, Ovada Hısashı men jary Iýmıkonyń úlken qyzy. Ákesi BUU-nyń halyqaralyq sotynyń tóraǵasy bolǵan. Masakodan basqa egiz qyzdary bar. Masako dıplomat ákesimen birge balalyq shaǵyn shet elde ótkizedi. Ákesi Máskeý men Nıý-Iorkte uzaq jyldar jumys istegen. Máskeýde turǵan kezinde eki jasar Masakony ata-anasy jergilikti bala-baqshaǵa bergen.
1971 jyly Masako Tokıoǵa oralyp, qyzdarǵa arnalǵan ataqty Denenchoýfý fýtaba degen jekemenshik mektepke qabyldanady. Odan soń qaıtadan shet elge sapar shegedi. Ákesi AQSh-taǵy Bostan qalasyndaǵy konsýldyqqa aýysyp, Japonııa elshisiniń kómekshisi qyzmetin atqarady. Mektepti bitirgen Masako Garvard ýnıversıtetine oqýǵa túsip, 1985 jylǵa deıin ekonomıka fakýltetinde bilim alady. Sondaı-aq Oksfordtaǵy kolledjde halyqaralyq qatynastar salasy boıynsha oqıdy. Biraq oqýyn aıaqtamastan 1986 jyly Japonııaǵa oralǵan Masako Tokıo ýnıversıtetinde oqıdy. Ana tilinen bólek aǵylshyn, fransýz tilderinde erkin sóıleıdi, nemis, orys, ıspan tilderin biledi.
Ákesiniń yqpalymen Masako dıplomat mamandyǵyn tańdaıdy. 1986 jyly Garvardtaǵy oqýyn bitirip, Japonııaǵa oralǵan Masako Tokıo ýnıversıtetine qyzmetke kiredi. Bir jyl ótkende kúrdeli kvalıfıkasııalyq emtıhandardy tapsyryp, Syrtqy ister mınıstrligine jumysqa ornalasady. Ovada Masako 1988 jyly Syrtqy ister mınıstrliginiń baǵyttaýymen Oksford ýnıversıtetinde oqý úshin Anglııaǵa barady. 1990 jyly elge oralǵan ol Syrtqy ister mınstrliginiń Soltústik Amerıka bóliminde jumys isteıdi.
Ovada Masako murager hanzadamen alǵash ret Tokıo ýnıversıtetinde oqyp júrgende kezdesken. Saltanatty sharaǵa shaqyrylǵan otyz qyzdyń ishinen murager hanzada Masakony tańdaıdy. Bul saltanatty sharaǵa Masako eń sońynan shaqyrylǵan degen derek bar. Arýlardyń tizimine Masakonyń aty birden jazylmaýynyń da sebebi bar. О́ıtkeni onyń naǵashy atasy elge ekologııalyq zııan ákelgen óndiris oshaǵyn basqarǵan. Iаǵnı, 1953-1956 jyldary Masakonyń atasy ashqan óndiris ornynan shyqqan ýly zat ózenge aǵyp, balyqtar arqyly qyryqtan astam adam ýlanǵan desedi. Ekologııalyq apatqa sebepker bolǵan adamnyń jıeni ımperator áýletine kelin bolýy tosyn oqıǵa sanalyp, qoǵamda ártúrli pikirlerdiń týýyna sebepker boldy.
1993 jyldyń 9 maýsymynda sıntoıstik dástúr boıynsha murager hanzada Narýhıto men Ovada Masakonyń úılený toıy bolady. Masako 2001 jyldyń 1 jeltoqsanynda Aıko esimdi qyzdy (resmı tıtýly Toshınomııa) dúnıege ákeledi. Zań boıynsha eger Aıko qarapaıym adamǵa turmysqa shyqsa bul tıtýlynan aıyrylady.
Dástúr boıynsha nemerelerdiń attaryn ımperator qoıý kerek, alaıda murager hanzada men Masako hanshaıym qyzyna esimdi ózderi tańdapty. Imperatordyń nemeresiniń esimi «mahabbat», «bala» degen maǵynadaǵy eki ıeroglıftiń birigýinen turady. Murager hanzada men hanshaıym ejelgi zaman fılosofy Men-szynyń «basqalardy jaqsy kóretin adam ǵana súıikti bolady, ózgelerdi syılaı biletin jandy da basqalar qurmetteıdi» degen sózin negizge alǵan desedi. Aıko hanshaıym 2005 jyldan Tokıodaǵy ulttyq balalar saraıynda oqı bastaıdy. 2006-2008 jyldar arasynda Gakýshıýın balalar baqshasynda tárbıelenedi. Ol qysh ydys jasaýdy, gımnastıkamen aınalysýdy jáne gúl baqshany kútýdi jaqsy kóredi. 2008 jyly Gakýshıýın bastaýysh mektebine oqýǵa barǵan Aıko hanshaıym 2014 jyldyń sáýirinen beri Gakýshıýın orta mektebinde bilim alýda. Sýmoý tamashalaǵandy unatady, óleń jazyp, pesalarǵa ssenarıı daıyndaıdy. Sondaı-aq fortopıano men skrıpkada oınap, án salady eken. 2001 jyly Narýhıto hanzadanyń alǵashqy balasy Aıko hanshaıymnyń dúnıege kelýine baılanysty Avstralııa teńge saraıy 300 danamen 1 kılogramdyq kúmis tıyndardy shyǵardy.
Ejelgi japon ańyzdarynda eldi segiz hanshaıymnyń bılegeni týraly jazylǵan. Alaıda 1947 jylǵy zań boıynsha muragerlik taq ul balaǵa berilýi kerek. Sondyqtan japon qoǵamynda «qyz da bolsa tuńǵysh nemere murager bola ma?» degen másele tóńireginde áńgimeler órbýde. О́ıtkeni, qazirgi ımperatordyń ekinshi balasy Akıshınonyń bir uly bar. 1965 jyly dúnıege kelgen Akıshıno Gakýshıýın mektebinde bilim alady. 1996 jyly Japonııada doktor dárejesin ıelenedi. Kallıgrafııanyń sheberi ári tennıs oınaǵandy unatatyn Akıshıno stýdent kezinde tennısten Kantoý aımaǵyndaǵy alǵashqy ondyqqa kirgen desedi.
Onyń zaıyby Akıshıno hanshaıym (burynǵy aty Kıko Kavashıma) 1966 jyly týǵan. Ol 1990 jyldyń maýsym aıynda Akıshıno hanzadaǵa turmysqa shyqqan soń ımperator áýletiniń múshesi bolyp qabyldanady. Imperatordyń ekinshi kelini Gakýshıýın ýnıversıtetinde psıhologııa magıstri dárejesin alǵan. Qazir Japonııanyń týberkýlezben kúres assosıasııasynyń tóraıymy, «Japon Qyzyl krest qoǵamy» prezıdentiniń orynbasary retinde jubaıymen birge resmı, qoǵamdyq sharalarǵa qatysyp turady. Akıshıno hanzadanyń qaramaǵyna 9 uıym bar. Akıshınonyń zaıyby 1991 jáne 1994 jyldary Mako, Kako esimdi qyzdardy dúnıege ákelgen. Al 2006 jyldyń 6 qyrkúıeginde Hısahıto esimdi ul bala týdy. Bul sońǵy 41 jylda ımperator áýletinde týylǵan alǵashqy er bala.
Imperatordyń jalǵyz qyzy Saıako 1992 jyly Gakýshıýın ýnıversıtetin bitirgen. Qustar tabıǵatyn zertteýmen aınalysady. 2005 jyldyń qarasha aıynda Tokıo mýnısıpalıtetinde qyzmet atqaratyn Ioshıkı Kýroda esimdi dızaınerge turmysqa shyqqan soń «mártebeli hanshaıym» degen tıtýlynan aıyrylady. Imperator saraıynyń basqarmasynyń sheshimimen Saıako 152,5 mıllıon ıen (1,3 mıllıon dollar) syıaqymen uzatylady. Qarapaıym azamatqa turmysqa shyqqan Saıako bir rettik syıaqyny alǵan soń ımperator áýletiniń múshesi bolyp eseptelmeıdi. Ioshıkı Kýroda negizinen ata-tegi aqsúıek (kadzoký) bolǵanmen, 1947 jyly tıtýlynan aıyrylǵandyqtan qarapaıym áýlet bop esepteledi. Kýroda tegin ıelengen Saıako kúıeýiniń keńesimen ornıtologııalyq ınstıtýttaǵy qyzmetin de tastaıdy.
Qazaqstan tarıhynda Prezıdent Nursultan Nazarbaev Kúnshyǵys eline tórt ret resmı is-saparmen bardy. 1994 jáne 1999 jyldary Elbasynyń Tokıoǵa barǵan saparynda eki jaqty mańyzdy qujattarǵa qol qoıyldy. 2008 jyldyń shilde aıynda Japonııaǵa sapary kezinde Qazaqstan basshysy Nursultan Nazarbaev mártebeli ımperator Akıhıtony eki el arasyndaǵy dostyqtyń nyǵaıýyna qosqan úlesi úshin «Altyn qyran» ordenimen marapattap, Qazaqstanǵa shaqyrǵan bolatyn.
2016 jyly 7 qarashada Elbasy Japonııaǵa resmı is-sapary barysynda ımperator Akıhıtomen kezdesti. Japon basylymdary («Asahı», «Nıhonkeıdzaı shınbýn») bul kezdesýdiń eki memleket úshin mańyzy týraly jazyp jatty. Bul kezdesýde japon sarbazdary (Sibir áskerı tutqyndary) men jekelegen turǵyndardyń konslagerge, bir bóligi Qazaqstanǵa aıdalǵany týraly aıtyldy. Imperator saraıy basqaramasynyń málimetine súıensek, týǵan jerinen jyraqta ómir súrgen japondar týraly áńgime qozǵalyp, ımperator Qazaqstanǵa barǵan japon azamattaryn halyqtyń jyly qabyldaǵany úshin alǵys aıtty. «Asahıdiń» jazýynsha, Qazaqstan Prezıdentiniń sózin japon ımperatory zor yqylaspen, muqııat tyńdaǵan.
2013 jyldyń 23 jeltoqsanynda ımperator Akıhıtonyń 80 jyldyq mereıtoıy qarsańynda ótken saltanatty qabyldaýda qazaq pen japon halyqtarynyń dostyǵynyń nyshany retinde Kúnshyǵys eli jaıynda jazylǵan «Kúnshyǵys ańyzdary» jáne «Qyzyl qaqpanyń qupııasy» dep atalatyn eńbekterimizdi qoltańba jazyp, Japonııanyń Tótenshe jáne О́kiletti elshisi Kamohara Masaıoshıge tartý etken bolatynbyz.
2017 jyldyń maýsym aıynda Japonııa Parlamenti ımperator Akıhıtoǵa kózi tirisinde taǵyn óz muragerine tapsyrýǵa ruqsat etetin arnaıy Zań qabyldady. Bul Zańǵa sáıkes murager hanzada Narýhıto taqqa 2019 jyldyń 1 qańtarynda otyrady dep kútilýde.
Sharafat Jylqybaeva
japontanýshy