Eki eldiń isker toptary men memlekettik qyzmetkerleri qatysqan sharada Qazaqstan Respýblıkasy Investısııalar jáne damý mınıstri Jeńis Qasymbek AQSh-tyń Qazaqstanǵa eń kóp ınvestısııa salyp kele jatqan el ekenin aıta kelip, aldaǵy ýaqytta ózara iskerlik qatynasty odan saıyn damytýǵa shaqyrdy.
«Qazaqstan Eýrazııalyq ekonomıkalyq odaqtyń bir múshesi retinde kedendik shekarasy joq 180 mln-nan astam halqy bar, syrtqy taýar aınalymy shamamen 1 trln dollarǵa jetetin iri naryqtyń bir bóligi», - degen mınıstr Qytaı naryǵyna da Qazaqstan arqyly erkin shyǵý múmkindigin tanystyrdy.
Mınıstrdiń aıtýynsha, Qazaqstanda ınvestısııa tartý úshin barlyq qolaıly jaǵdaılar jasalǵan. Búginde Qazaqstanda 10 arnaıy ekonomıkalyq aımaq pen túrli salalarǵa baǵyttalǵan 20-ǵa jýyq ındýstrıaldy aımaq jumys isteıdi. AEA qatysýshylaryna ruqsat berý prosedýralaryn jeńildetý jáne jeńildikter toptamasy qarastyrylǵan. Sonymen qatar, úsh memlekettik baǵdarlama júzege asyrylýda, atap aıtar bolsaq, «Nurly jol» - kóliktik-logıstıkalyq, ındýstrıaldy, energetıkalyq ınfraqurylymdy damytýǵa baǵyttalǵan. «Nurly jer» turǵyn úı qurylysy baǵdarlamasy jáne 2020 jylǵa deıin ındýstrıaldy-ınnovasııalyq damytý baǵdarlamasy - ol qaıta óńdeý salasynda joǵary tehnologııalyq eksportqa beıimdelgen ónimdi óndirýge baǵyttalǵan. Munda túrli memlekettik qoldaý sharalary bar: nesıe boıynsha paıyzdyq ústemaqyny sýbsıdııalaý, servıstik qyzmet kórsetý, ınvestısııalyq jáne salyqtyq artyqshylyqtar.
Mınıstr óz sózinde memleket tarapynan irili-usaqty bıznesti qoldaý úshin usynylǵan osy múmkindikterdiń sheteldik kásipkerler úshin de, sonyń ishinde amerıkalyq isker adamdar úshin de usynylatynyn aıtty.
Qazirgi tańda elimizde túri salalarda amerıkalyq kapıtaldyń qatysýymen birlesken 500-ge jýyq kásiporyn jumys isteıdi. Sońǵy on jylda Qazaqstanǵa tikeleı ınvestısııa aǵymy 265 mlrd dollardan asyp jyǵylǵan.
О́z sózinde «Astana halyqaralyq qarjy ortalyǵy» (AHQO) basqarma dırektory Qaırat Kelimbetov jyl sońyna deıin elordada jumys isteı bastaıtyn óńirlik qarjy ortalyǵynyń sheteldik ınvestorlarǵa barynsha qolaıly jaǵdaı jasaıtynyn aıtty.
Astana qarjy ortalyǵy Shanxaı qor bırjasy men amerıkalyq Nasdaq Inc bırjasymen ornatylǵan áriptestikti odan ári keńeıtip, Eýropanyń eń iri bırjalarynyń birin tartýdy kózdeıdi. “Nasdaq búginde saýda prosesterin IT-sheshimdermen qamtamasyz etýshi provaıder bolyp otyr. Sonymen qatar biz Nasdaq-ty AHQO aksıoneri bolýǵa shaqyryp jatyrmyz”, – dedi Kelimbetov.
Ortalyqtyń aksıoneri jáne strategııalyq seriktesi – Shanxaı qor bırjasy qazaqstandyq bırjany álemdik standarttarǵa saı joǵary texnologııalyq bırjalardyń birine aınaldyrýdy josparlap otyr.
“Qazir biz Eýropada eń iri ulttyq bırjalardyń birin “Astana” qarjy ortalyǵyna seriktes etý úshin kelissózder júrgizýdemiz. Bul xalyqaralyq bırjalardyń Astanadaǵy áriptestiginiń birinshi kezeńi ǵana. Kelesi kezeńde biz jahandyq ınvestısııalyq bankterdi jáne jahandyq qorlardy shaqyratyn bolamyz. Bul ekinshi kezeń bolady. Jyl sońynda alǵashqy nátıjelerdi jarııalaıtyn bolamyz”, – dep tolyqtyrdy Qaırat Kelimbetov.
Kelimbetovtyń atap ótkenindeı, Astana halyqaralyq qarjy ortalyǵynyń aǵylshyn zańymen jumys isteýi, ondaǵy sot júıesiniń Qazaqstan Respýblıkasy sot júıesinen táýelsiz bolýy ınvestorlarǵa qolaıly orta qalyptastyrmaq.
Sóz sońynda basqarma qarjy ortalyǵynyń basshysy Astana qalasynyń TMD elderi, ShYU uıymyna múshe memleketter men Oralyq Azııa elderiniń qarjylyq astanasyna aınalatynyn aıtty.
О́z kezeginde AQSh-tyń Qazaqstandaǵy Elshisi Djordj Krol Astananyń bıznes áleýetin joǵary baǵalaı otyryp: «Qazaqstandaǵy ekonomıkalyq órleý tek eldiń ishinde kórinis taýyp qana qoımaı, sonymen qatar kórshiles elderdiń alaǵa jyljýyna túrtki bolyp otyr. Bul turǵyda Astananyń mańyzy orasan. Keshegi ShYU elderiniń qataryna Úndistan men Pákistannyń qosylýyn Amerıka Qurama Shtattary qoldap otyr jáne aldaǵy ýaqytta óńirmen ekonomıkalyq baılanysty arttyrýǵa múddeli. Astananyń EKSPO kórmesinen keıin de óńirlik «jasyl ekonomıka» jáne IT ortalyǵyna aınalatynyna kúmánimiz joq», - dedi.
Baýyrjan Muqanov,
"Egemen Qazaqstan"